ទីក្រុងបាងកក ត្រូវជួបគ្រោះទឹកជំនន់ធ្ងន់ធ្ងរ ដល់ចុងខែ

ទីក្រុងបាងកក នៃប្រទេសថៃ ត្រូវជួបគ្រោះទឹកជំនន់ធ្ងន់ធ្ងរដល់ចុងខែ ដោយសារតែកម្ពស់ទឹកទន្លេ ចៅប្រាយ៉ា បន្តហក់ឡើងខ្ពស់ព្រោះតែការទម្លាយទឹកចេញពីទំនប់។

តាមការផ្សាយរបស់ Bangkok Post ដកស្រង់ប្រភពពីការិយាល័យធនធានទឹកជាតិ (ONWR) កាលពីថ្ងៃពុធទី១៩ខែវិច្ឆិកាឆ្នាំ២០២៥, បច្ចុប្បន្នកម្រិតទឹកក្នុងអាងស្តុកទូទាំងប្រទេសបានឈានដល់៩០%ហើយ ដូច្នេះការបញ្ចេញរំដោះទឹក នឹងធ្វើឲ្យរាជធានីនៃប្រទេសថៃ ត្រូវជួបគ្រោះទឹកជំនន់ធ្ងន់ធ្ងររហូតដល់ថ្ងៃទី២៩ខែវិច្ឆិកា។

ទឹកទន្លេចៅប្រាយ៉ា នឹងឡើងដល់ចន្លោះពី ១.៧ ទៅ ២ ម៉ែត្រ ពីលើកម្រិតនីវ៉ូទឹកសមុទ្រ នៅចន្លោះម៉ោង ៨ ព្រឹក ដល់ ៣ រសៀល ពោលគឺកម្រិតទឹកនេះ លើសពីកម្រិតប្រកាសអាសន្ន ០.៣០ ម៉ែត្រទៅហើយ ដែលបង្កើនហានិភ័យនៃទឹកជំនន់នៅក្នុងសហគមន៍ទាបៗ។

មិនមែនតែបាងកក ខេត្តផ្សេងទៀតនៅជុំវិញនោះក៏ប្រឈមហានិភ័យគ្រោះទឹកជំនន់ធ្ងន់ធ្ងរផងដែរដូចជា៖ Samut Prakan, Nonthaburi, Pathum Thani, Samut Sakhon, Nakhon Pathom និង Samut Songkhram។

មុននេះ ONWR ក៏ចេញការព្រមានអំពីព្យុះភ្លៀងដែលនឹងវាយប្រហារភាគខាងត្បូងប្រទេស មួយសប្តាហ៍ពេញផងដែរ ក្នុងនោះមាន៨ខេត្ត ប្រឈមហានិភ័យខ្ពស់នៃបំណាក់ដីនិងជំនន់រហ័ស។

តាមការផ្សាយរបស់ The Nation, ខេត្ត Narathiwat, Yala, Satun, Songkhla, Phatthalung, Nakhon Si Thammarat, ​Surat Thani និង Chumphon នឹងរងការវាយប្រហារធ្ងន់ធ្ងរជាមួយកម្រិតភ្លៀងធ្លាក់ ២០០មិល្លីម៉ែត្រដល់ថ្ងៃអាទិត្យ៕

អត្ថបទ៖ សុខ សុវណ្ណ