រដ្ឋមន្ត្រីការបរទេសថៃ៖ «បទឈប់បាញ់ជាមួយកម្ពុជា មិនដំណើរការទេ»

ស្របពេលជម្លោះប្រដាប់អាវុធដែលផ្ទុះឡើងថ្មីរវាងកម្ពុជានិងថៃ ឈានដល់ថ្ងៃទី៣ហើយនោះ រដ្ឋមន្ត្រីការបរទេសថៃ Sihasak Phuangketkeow បានបញ្ជាក់យ៉ាងច្បាស់ថា បទឈប់បាញ់គឺមិនដំណើរការទេ។

ក្នុងបទសម្ភាសជាមួយ BBC នៅថ្ងៃអង្គារទី៩ខែធ្នូឆ្នាំ២០២៥ លោក Sihasak និយាយថា បទឈប់បា​ញ់កម្ពុជា-ថៃ មិនដំណើរការទេ ហើយប្រសិនបើសហរដ្ឋអាមេរិកនៅតែបន្តពាក់ព័ន្ធនោះ ថៃត្រូវការជំនួ​យពីអាមេរិកដើម្បីស្វែងរក សន្តិភាពពិតប្រាកដ មិនមែនគ្រាន់តែជាអ្វីដែលសរសេរលើក្រដាសនោះទេ»។

សូមជម្រាបជាថ្មី ប្រធានាធីបតីអាមេរិក ដូណាល់ ត្រាំ បានដើរតួនាទីយ៉ាងសស្រាក់សស្រាំក្នុងការនាំយកសន្តិភាពជូនកម្ពុជា ក្នុងជម្លោះព្រំដែនជាមួយថៃ។

លោកបានធ្វើការជាមួយនាយករដ្ឋមន្ត្រីម៉ាឡេស៊ីនិងជាប្រធានអាស៊ានប្តូរវេនឆ្នាំ២០២៥ អាន់វ៉ា អ៊ីប្រាហ៊ីម ដើម្បីនាំមកនូវបទឈប់បាញ់កម្ពុជា-ថៃថ្ងៃទី២៨ ខែកក្កដា ឆ្នាំ២០២៥។

មកដល់ថ្ងៃទី២៦ខែតុលា ពោលគឺក្នុងអំឡុងកិច្ចប្រជុំអាស៊ាននៅទីក្រុងគូឡាឡាំពួ លោកត្រាំនិងលោកអាន់វ៉ា បានធ្វើជាសាក្សីនៃកិច្ចព្រមព្រៀងសន្តិភាពបន្តទៀត ប៉ុន្តែថៃ នៅតែបន្តឈ្លានពានកម្ពុជា មិនខ្វល់អ្វីទាំងអស់៕

អត្ថបទ៖ សុខ សុវណ្ណ