អានុទីន បញ្ជាក់ជាថ្មីថា ថៃមិនខ្វល់នឹង «ការគំរាមកំហែងពន្ធ» ដើម្បីឱ្យបញ្ចប់សង្រ្គាមឈ្លានពានកម្ពុជាទេ

នាយរដ្ឋមន្រ្តីថៃ លោក អានុទីន ឆានវីរៈគុណ បាន​បញ្ជាក់ជាថ្មីម្ដងទៀតក្នុងន័យ​ថា​ ប្រទេសថៃមិនខ្វល់នឹង​ការគំរាមកំហែងពន្ធរបស់ប្រធានាធិបតីអាមេរិក លោក ដូណាល់ ត្រាំ នោះទេ ចំពេលដែលថៃបានបើកការឈ្លានពានទ្រង់ទ្រាយធំលើអធិបតេយ្យភាពរបស់កម្ពុជា។ នេះបើតាមការចុះផ្សាយរបស់សារព័ត៌មាន​ Thai Enquirer នាថ្ងៃអង្គារ​ ទី ៩ ធ្នូ នេះ។

ថៃបាន​បើកការវាយប្រហារ រួមទាំងទម្លាក់គ្រាប់បែកដោយប្រើយន្តហោះចម្បាំង លើទីតាំងយោធា និងជនស៊ីវិលកម្ពុជាជាច្រើនកន្លែងរាប់តាំងពីថ្ងៃអាទិត្យមក។ គិតត្រឹមព្រឹកថ្ងៃអង្គារនេះ ជនស៊ីវិលកម្ពុជាប្រមាណ ៧ នាក់ ត្រូវបាន​សម្លាប់ និង ២០ នាក់ បាន​រងរបួស។

ចំពេលដែលថៃបើកការវាយប្រហារឈ្លានពានឥតស្រាកស្រាន្តនោះ លោក អានុទីន បាន​ច្រានចោលពីលទ្ធភាពនៃការចរចារកដំណោះស្រាយភ្លាមៗជាមួយកម្ពុជា ខណៈមេដឹកនាំយោធាជាន់ខ្ពស់ថៃលោក Chaiyaprheuk Duangp raphat បាន​ទទូចថា យោធាថៃបានកំណត់គោលដៅបំផ្លាញ «សមត្ថភាពយោធាកម្ពុជា​ឱ្យ​បាន​រយៈពេលយូរ» ដើម្បី «កុំឱ្យអាចគំរាមកំហែងដល់អធិបតេយ្យភាព» របស់ថៃ។

លោក អានុទីន ថ្លែងយ៉ាងដូច្នេះថា៖ «គ្មានការចរចាទៀតទេ។ ប្រសិនបើកម្ពុជាចង់ឈប់បាញ់គ្នា កម្ពុជាត្រូវតែស្របតាមការចង់បាន​របស់យើង»។ លោក អានុទីន បាន​និយាយទៀតថា លោកមិនបាន​ទំនាក់ទំនងជាមួយ​លោក ត្រាំ ឬនាយករដ្ឋមន្រ្តី ម៉ាឡេស៊ី លោក អាន់វ៉ា អ៊ីប្រាហ៊ីម ទេ «ព្រោះវាជាបញ្ហាទ្វេភាគី» រវាងថៃ និងកម្ពុជា។

ក្រោយការប្រហាររបស់ថៃ កម្ពុជាបាន​ប្រកាន់យកជំហរមិនតបត ដើម្បីគោរពដល់កិច្ចព្រមព្រៀងសន្តិភាពក្រុងកូឡាឡំពួរនៅចុងខែតុលា និងកិច្ចស្វែងរកដំណោះស្រាយដោយសន្តិវិធីផ្សេងៗ ដែលភាគីថៃ និងកម្ពុជា បាន​ឯកភាពគ្នា។

យ៉ាងណាមិញ នៅព្រឹកថ្ងៃអង្គារនេះ សម្ដេចតេជោ ហ៊ុន​ សែន នាយឧត្ដមសេនីយ៍ផុតលេខផ្កាយមាស៥  បានបញ្ជាឱ្យកងទ័ពការពារជាតិកម្ពុជា ប្រើសិទ្ធិការពារខ្លួនបាញ់តបតទៅកាន់ភាគីថៃវិញ​ ក្រោយពីអត់ធ្មត់មិនតបតនឹងការបាញ់ប្រហាររបស់ភាគីថៃរយៈពេល១ថ្ងៃ ដើម្បីគោរពបទឈប់បាញ់ និងជម្លៀសពលរដ្ឋចេញពីទីតាំងរងគ្រោះខ្លាំងទៅកាន់ទីតាំងមានសុវត្ថិភាព​។

សម្ដេច ហ៊ុន សែន បាន​បញ្ជាក់យ៉ាងដូច្នេះថា៖«យើងការពារទឹកដីយើង ដោយមានលេណដ្ឋានរឹងមាំជាមួយអាវុធគ្រប់ប្រភេទ។ ឯសត្រូវឈ្លានពានត្រូវចល័តវាយចូលទីតាំងយើង ពួកគេមិនអាចទួលលេណដ្ឋានមកបានទេ ហើយក្បាលពួកគេក៏មិនបានប៉ានដែកដែរ។ ស្ថានភាពនេះផ្តល់ប្រៀបឲ្យយើងអនុវត្តន៍យុទ្ធវិធីកំទេចកម្លាំងរស់របស់សត្រូវតាមរយះការចាត់តាំងទប់ទល់»៕