អាមេរិក ត្រៀមចាត់វិធានការ បើអឺរ៉ុបមិនយកចិត្តទុកដាក់លើកោះ Greenland

កាលពីថ្ងៃព្រហស្បតិ៍ទី៨ខែមករា អនុប្រធានាធិបតីអាមេរិក លោក JD Vance បានជំរុញឲ្យបណ្ដាប្រទេសអឺរ៉ុបត្រូវតែយកចិត្តទុកដាក់ចំពោះសន្តិសុខលើកោះ Greenland កាន់តែខ្លាំងឡើង ដោយព្រមានថា អាមេរិកនឹងធ្វើអន្តរាគមន៍ភ្លាមៗ ប្រសិនបើពួកគេមិនធ្វើសកម្មភាពអ្វីសោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារ AA លោក Vance បានប្រាប់អ្នកយកព័ត៌មានថា «អ្វីដែលយើងកំពុងស្នើសុំឲ្យមិត្តភក្តិអឺរ៉ុបរបស់យើងធ្វើ គឺយកចិត្តទុកដាក់ចំពោះសន្តិសុខនៃដីនោះកាន់តែខ្លាំង ពីព្រោះប្រសិនបើពួកគេមិនធ្វើទេ សហរដ្ឋអាមេរិកនឹងត្រូវធ្វើអ្វីមួយជាក់ជាមិនខានឡើយ»។

ទោះជាយ៉ាងណា អនុប្រធានាធិបតីបានបដិសេធមិនបញ្ជាក់ពីសកម្មភាពអ្វីដែលទីក្រុងវ៉ាស៊ីនតោនអាចធ្វើនោះទេ ដោយលោកថា នឹងទុកការសម្រេចចិត្តនោះទៅឲ្យប្រធានាធិបតីអាមេរិក ដូណាល់ ត្រាំ ខណៈដែលការចូលរួមការទូតនៅតែបន្តជាមួយដៃគូអឺរ៉ុប។

លោក Vance បានសង្កត់ធ្ងន់លើសារៈសំខាន់ជាយុទ្ធសាស្ត្ររបស់ទឹកដីនេះ ដោយកត់សម្គាល់ថាកោះ Greenland មានសារៈសំខាន់មិនត្រឹមតែសម្រាប់ការការពារមីស៊ីលអាមេរិកប៉ុណ្ណោះទេ ប៉ុន្តែសម្រាប់សន្តិសុខសកលផងដែរ។ លោកបានព្រមានថា «សត្រូវដែលមានអរិភាព» បានបង្ហាញចំណាប់អារម្មណ៍យ៉ាងខ្លាំងនៅក្នុងតំបន់មួយនេះ។

លោកមានប្រសាសន៍ថា «ដំបូន្មានរបស់ខ្ញុំចំពោះមេដឹកនាំអឺរ៉ុប និងអ្នកដទៃទៀត គឺត្រូវយកចិត្តទុកដាក់ចំពោះប្រធានាធិបតីសហរដ្ឋអាមេរិកយ៉ាងម៉ឺងម៉ាត់បំផុត»។

លោកត្រាំបានប្រាប់កាសែត The New York Times ថា សហរដ្ឋអាមេរិកត្រូវតែកាន់កាប់កោះ Greenland ទាំងស្រុង ជាជាងបន្តកិច្ចព្រមព្រៀងជំនួសដូចជាការជួល ឬសន្ធិសញ្ញា។ ភាពជាម្ចាស់គឺមានសារៈសំខាន់ខ្លាំងណាស់។ ពីព្រោះនោះជាអ្វីដែលលោកមានអារម្មណ៍ថា ត្រូវការសម្រាប់ភាពជោគជ័យមួយនេះ។

យ៉ាងណា អ្នកនាំពាក្យសេតវិមាន លោកស្រី Karoline Leavitt បានបញ្ជាក់ក្នុងន័យសម្រួលសម្ដីលោកត្រាំថា ជម្រើសទាំងអស់នៅតែមាននៅលើតុ ខណៈដែលលោក Rubio បានប្រាប់សមាជិកសភាថា លោកត្រាំមានគោលបំណងទិញទឹកដីនេះមែន តែមិនមានគម្រោងឈ្លានពានយោធាណាមួយដែលជិតមកដល់នោះទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ហាម៉ាស មិនគ្រប់គ្រង ហ្គាហ្សា ទេ ដោយត្រៀមប្រគល់ឲ្យគណៈកម្មាធិការឯករាជ្យមួយ