​​កង​ឆ្មាំបដិវត្តន៍អ៊ីរ៉ង់គំរាម​សងសឹកអាមេរិក​និង​អ៊ីស្រាអែល​ ឲ្យ​«សាហាវបំផុត»

កងកម្លាំងឆ្មាំបដិវត្តន៍អ៊ីរ៉ង់បានស្បថនៅថ្ងៃអាទិត្យ ទី១ ខែមីនាក្នុងថ្ងៃ​ដែល​ដំណឹង​​​មរណភាព​នៃ​មេដឹកនាំ​អ៊ីរ៉ង់​ត្រូវ​បាន​ប្រកាស​ជាផ្លូវការ​ ថា ពួកគេនឹងចាប់ផ្តើមប្រតិបត្តិការ «ដ៏សាហាវបំផុត» ក្នុងប្រវត្តិសាស្ត្រប្រឆាំងនឹងមូលដ្ឋានទ័ពអ៊ីស្រាអែល និងសហរដ្ឋអាមេរិក។

​​​​ការ​ស្បថ​របស់​​​​កងឆ្មាំ​បដិវត្តន៍​អ៊ីរ៉ង់កើត​​​ឡើង​​ នៅ​បន្ទាប់ពីការស្លាប់របស់មេដឹកនាំកំពូលរបស់ពួកគេ គឺ អាចារ្យ សាសនាអ៊ីស្លាម លោក Ayatollah Ali Khamenei ដោយសារ​តែការ​វាយប្រហារ​​​​របស់​​កង​ទ័ព​​អាមេរិក និង​​អ៊ីស្រាអែល នៅថ្ងៃទី​​​២៨ខែកុម្ភៈ ​​ដោយ​ចោទ​ប្រកាន់​ថា របបដឹកនាំអឺរ៉ង់សព្វថ្ងៃ​ជាអ្នក​គាំទ្រ​ដល់​​ក្រុម​បណ្តាញ​​ភេរវក​​រ​នៅ​ទូទាំងពិភពលោក​។

លោក Ayatollah Ali Khamenei វ័យ​​៨៦​ឆ្នាំ ជាមេដឹកនាំកំពូលរបស់អ៊ីរ៉ង់ចាប់តាំងពីឆ្នាំ១៩៨៩ ត្រូវបានសម្លាប់នៅក្នុងការវាយប្រហារដ៏ធំសម្បើមរបស់សហរដ្ឋអាមេរិក និងអ៊ីស្រាអែល ​ចាប់តាំងពី​ថ្ងៃ​​​សៅរ៍ និង​បានពង្រីកដល់ថ្ងៃទីពីរនៅថ្ងៃអាទិត្យ ហើយ​សហរដ្ឋអាមេរិក​ បាន​​ប្រកាស​ពី​​ការ​បន្ត​ប្រតិបត្តិការ​​​ទៅមុខ​ទៀត។​

​​​ប្រតិបត្តិការ​យោធារួម​គ្នា​ទ្រង់ទ្រាយធំ​បែបនេះ​របស់​សហរដ្ឋអាមេរិក​និង​អ៊ីស្រាអែល​ ត្រូវបាន​​មហាអំណាច​ចិន និង​​រុស្ស៊ី​ដែលសុទ្ធសឹង​ជា​មហាអំណាច​មាននុយក្លេអ៊ែរ​ ថ្កោល​ទោស​យ៉ាង​ខ្លាំង​ និង​ចាត់​ទុក​ជា​ការ​បំពាន​ច្បាប់អន្តរជាតិ ដោយសារ​តែ​ការ​រំលោភ​​លើ​រដ្ឋអធិបតេយ្យ​​។ ​

​​កា​រវាយ​ប្រហារ​​​​របស់​អាមេរិក​និង​អ៊ីស្រាអែល​ ត្រូវ​អឺរ៉ង់​​ចាត់ទុកថា​ជាការ​រាមកំហែងដល់អស្ថិរភាពនៅមជ្ឈិមបូព៌ាទាំងមូល ដោយ​អ៊ីរ៉ង់​​នឹងវាយប្រហារសងសឹកដែលបានរាយការណ៍​រួច​មក​ហើយ​ថា កើត​​មាន​​លើ​មូលដ្ឋាន​ទ័ព​​អាមេរិក​​នៅទីក្រុងឌូបៃ បារ៉ែន និងកន្លែងផ្សេងទៀតដែលមានមូលដ្ឋានទ័ពអាមេរិក។

ការ​វាយ​ប្រហារ​​របស់​កងទ័ព​អាមេរិក​លើ​ប្រទេស​អ៊ីរ៉ង់ ត្រូវ​បាន​រាយការណ៍ថា បាន​ស្រោច​ខ្លាំង​លើបរិវេននៃ​លំនៅឋានរបស់​ លោក Khamenei នៅ​​ទីក្រុងតេហេរ៉ង់។

ប្រព័ន្ធផ្សព្វផ្សាយរដ្ឋអ៊ីរ៉ង់បាននិយាយថា មេដឹកនាំកំពូល Ayatollah Ali Khamenei ត្រូវបានសម្លាប់នៅក្នុងការវាយប្រហារតាមអាកាសដែលកំណត់គោលដៅបរិវេណរបស់គាត់នៅក្នុងទីក្រុងតេហេរ៉ង់។

​យោង​សេចក្តីរាយការណ៍​របស់​ CNA រូបថតផ្កាយរណបពីយន្តហោះ Airbus បានបង្ហាញថា ទីតាំងនោះត្រូវបានទម្លាក់គ្រាប់បែកយ៉ាងខ្លាំង។

ទូរទស្សន៍រដ្ឋបាននិយាយ​ ដោយ​ពិធីករ​​យំស្រក់​ទឹកភ្នែក អាន​បញ្ជាក់​នូវការស្លាប់របស់ Ali Khamenei នៅការិយាល័យរបស់គាត់ «បានបង្ហាញថាគាត់តែងតែឈរក្នុងចំណោមប្រជាជន និងនៅជួរមុខនៃការទទួលខុសត្រូវរបស់គាត់ ដោយប្រឈមមុខនឹងអ្វីដែលមន្ត្រីហៅថាភាពក្រអឺតក្រទមជាសកល»​។

​ជាមួយ​គ្នា​នោះនៅម្ខាងទៀត​នៃ​គួប្រជែង សំឡេងអបអរសាទរអាចត្រូវបានឮនៅតាមដងផ្លូវនៃទីក្រុងតេហេរ៉ង់ បន្ទាប់ពីរបាយការណ៍ដំបូងបានលេចចេញពីអ៊ីស្រាអែលអំពីការស្លាប់របស់លោក Khamenei ខណៈដែលផ្សែងខ្មៅហុយឡើងលើស្រុកដែលគាត់រស់នៅជាប្រចាំនោះ​។

ការវាយប្រហារនេះបានកើតឡើងជាច្រើនសប្តាហ៍បន្ទាប់ពីអាជ្ញាធរអ៊ីរ៉ង់បានបង្ក្រាបការតវ៉ាទ្រង់ទ្រាយធំដោយឃោរឃៅ ដោយបានសម្លាប់មនុស្សរាប់ពាន់នាក់។

ឆ្មាំបដិវត្តន៍អ៊ីរ៉ង់បានស្បថថានឹងដាក់ទណ្ឌកម្ម «យ៉ាងធ្ងន់ធ្ងរ និងម៉ឺងម៉ាត់» ចំពោះ «ឃាតករ»​ របស់លោក Khamenei៕

រ៉ាន់ រើយ​