អាមេរិក និងកូរ៉េខាងត្បូង បើកសមយុទ្ធយោធា ទោះវ៉ាស៊ីនតោនកំពុងជាប់ដៃក្នុងសង្គ្រាម

នៅថ្ងៃច័ន្ទ ទី៩ ខែមីនានេះ សហរដ្ឋអាមេរិក និងកូរ៉េខាងត្បូង បានចាប់ផ្ដើមសមយុទ្ធយោធារួមគ្នាប្រចាំឆ្នាំក្រោមឈ្មោះថា «Freedom Shield» បើទោះបីជាមានការព្រួយបារម្ភថា អាមេរិកកំពុងដកកម្លាំង និងសម្ភារៈសឹកមួយចំនួនទៅជួយសង្គ្រាមនៅតំបន់មជ្ឈិមបូព៌ាក៏ដោយ។

អគ្គសេនាធិការចម្រុះកូរ៉េខាងត្បូងបានបញ្ជាក់ថា កងទ័ពកូរ៉េប្រមាណ ១៨ ០០០​នាក់កំពុងចូលរួមក្នុងសមយុទ្ធនេះ ដែលនឹងបន្តរហូតដល់ថ្ងៃទី១៩ ខែមីនា។ ការចាប់ផ្ដើមសមយុទ្ធនេះ កើតឡើងចំពេលដែលមានព័ត៌មានលេចឮថា អាមេរិកបានផ្លាស់ប្តូរទីតាំងប្រព័ន្ធការពារមីស៊ីល Patriot មួយចំនួនចេញពីកូរ៉េខាងត្បូង ដើម្បីយកទៅគាំទ្រប្រតិបត្តិការសឹកប្រឆាំងនឹងប្រទេសអ៊ីរ៉ង់។ ទោះជាយ៉ាងណា មន្ត្រីកូរ៉េខាងត្បូងបានអះអាងយ៉ាងមុតមាំថា ការផ្លាស់ប្តូរគ្រឿងយុទ្ធោបករណ៍នេះ នឹងមិនមានផលប៉ះពាល់ធ្ងន់ធ្ងរ​ដល់សមត្ថភាពការពាររួមគ្នានៃសម្ព័ន្ធមិត្តទាំងពីរនោះឡើយ។

អ្វីដែលគួរ​​ឲ្យ​កត់សម្គាល់ក្នុងឆ្នាំនេះគឺ ចំនួននៃសមយុទ្ធនៅទីវាលជាក់ស្ដែងត្រូវបានកាត់បន្ថយមកត្រឹម ២២កម្មវិធីប៉ុណ្ណោះ បើធៀបនឹងឆ្នាំមុនដែលមានរហូតដល់ ៥១កម្មវិធី។ ការកាត់បន្ថយនេះត្រូវបានគេមើលឃើញថា ជាការបន្ទន់ឥរិយាបថដើម្បីបើកផ្លូវដល់ការចរចា បន្ទាប់ពីមេដឹកនាំកូរ៉េខាងជើង លោក គីម ជុងអ៊ុន បានបង្ហាញសញ្ញាថា លោកអាចនឹងយល់ព្រមចរចា បើអាមេរិកដកលក្ខខណ្ឌ​ការរំសាយអាវុធនុយក្លេអ៊ែរ​ចេញពីតុពិភាក្សា។

ទន្ទឹមនឹងនេះ ប្រធានាធិបតីកូរ៉េខាងត្បូង លោក Lee Jae Myung បានបង្ហាញបំណងយ៉ាងខ្លាំងក្នុងការស្ដារកិច្ចសន្ទនាឡើងវិញ។ មន្ត្រីកូរ៉េខាងត្បូងសង្ឃឹមថា ដំណើរទស្សនកិច្ចរបស់លោកប្រធានាធិបតី​អាមេរិក ដូណាល់ ត្រាំ ទៅកាន់ប្រទេសចិននៅចុង​ខែ​មីនា​នេះ អាចនឹងក្លាយជាឱកាសមាសក្នុងការបំបែកភាពទាល់ច្រកផ្នែកការទូត និងនាំមកនូវស្ថិរភាពដល់ឧបទ្វីបកូរ៉េឡើងវិញ ដ្បិត​ភាពតានតឹងសកលកំពុងពុះកញ្ជ្រោលក៏ដោយ៕

ប្រែសម្រួល៖ ឈាង