ស្ថាបនិកនៃសារព័ត៌មាន​ CNN ​និង​មូលនិធិ UN លោក Ted Turner ស្លាប់​ក្នុងវ័យ​៨៧ឆ្នាំ​

ជាអ្នកតស៊ូ​មតិ​ផ្នែក​ប្រព័ន្ធផ្សព្វផ្សាយនិង​ជាសប្បុរសជន បាន​​បង្កើត​​បណ្តាញ​​សារព័ត៌មាន​ខ្សែកាប​​ (CNN)​ ដែលផ្តល់​​ ​ព័ត៌មាន ២៤ម៉ោង​ឈានមុខ​គេ និង​ធ្វើ​ឱ្យ​សារព័ត៌មាន​ទូរទស្សន៍​មាន​ភាព​រស់​វើក​នៅ​សហរដ្ឋ​អាមេរិក​ បុរស​ម្នាក់​នោះ គឺ លោក Ted Turner ដែល​​ទទួល​មរណ​ភាព​​នៅ​ថ្ងៃ​ពុធ ក្នុង​វ័យ​ ៨៧ឆ្នាំ​។ នេះបើយោង​តាមសេចក្តីប្រកាស​ព័ត៌មាន​ពី​​ក្រុមហ៊ុនសហគ្រាស​របស់​លោក ឈ្មោះ​ថា «Turner Enterprises»​ ។

យោង​តាម​សារព័ត៌មាន CNN ផ្សាយ​ថ្ងៃ​ទី​៦ ខែឧសភា ឆ្នាំ​២០២៦ អ្នកជំនួញ​ផ្នែក​ទូរទស្សន៍​ Atlanta កើតនៅ​រដ្ឋ Ohio រូបនេះ មាន​រហស្ស​នាមថា «អ្នកវោហារនៃភាគខាងត្បូង» ដោយ​សារតែចរិត​និយាយ​ត្រង់ៗ​របស់លោក បាន​បង្កើតអាណាចក្រប្រព័ន្ធផ្សព្វផ្សាយមួយ រួម​បញ្ចូល​ស្ថានីយ៍ខ្សែកាបដំបូង​គេ ប៉ុស្តិ៍ពេញនិយមសម្រាប់​ភាព​យន្ត ​គំនូរជីវចល បូករួមទាំងក្រុមកីឡា​អាជីព​ដូចជា​ Atlanta Braves ផង​ដែរ​។

លោក Turner ក៏ជាអ្នកបើក​ទូកក្ដោងដ៏ល្បីល្បាញលើពិភពលោកផង​ដែរ ជាអ្នកសប្បុរសជនដែល​បានបង្កើតមូលនិធិអង្គការសហប្រជា​ជាតិ (UN) ជាអ្នកសកម្មជនដែល​ស្វែងរកការលុបបំបាត់​អាវុធនុយក្លេ​អ៊ែរទូទាំងពិភពលោកនិងជាអ្នកអភិរក្សម្នាក់​នៅ​សហរដ្ឋអាមេរិក។

​បុរស​រូបនេះ​ ថែមទាំងបាន​បង្កើតរូបតុក្កតា Captain Planet ដើម្បី​អប់រំកុមារអំពីបរិស្ថាន​ទៀតផង។

សមិទ្ធផល​ទាំង​អស់​នោះ ​គឺជាចក្ខុវិស័យដ៏ក្លាហានរបស់លោក​ក្នុងការផ្តល់ព័ត៌មាន​ពីជុំវិញ​ពិភពលោកក្នុងពេលវេលាជាក់ស្តែង និង​គ្រប់ពេល​ផង​ដែរ​។

នៅឆ្នាំ ១៩៩១ លោក Turner ត្រូវបាន​ទស្សនាវដ្តី Time ​បាន​ផ្តល់​កិត្តិយស​ដាក់ឈ្មោះ​ជាបុរសប្រចាំ​ឆ្នាំ​ (​Man of The Year) សម្រាប់ឥទ្ធិពល​លើសក្ដានុពលនៃព្រឹត្តិការណ៍​នានា ​និង​​ធ្វើ​ឱ្យ​អ្នកទស្សនា​ក្នុង ១៥០ប្រទេស​ក្លាយជាសាក្សី​នៃ​ប្រវត្តិសាស្ត្រភ្លាមៗ។

ជុំវិញ​មរណភាព​ដែល​ចាត់ទុក​ជាការ​បាត់​បង់​ដ៏ធំ​មួយ​នេះ លោក Mark Thompson ប្រធាន និងជានាយកប្រតិបត្តិ​នៃ​សារព័ត៌មាន​ CNN Worldwide លើក​ឡើង​ក្នុងសេចក្តីថ្លែងការណ៍​មួយ​ថា ៖ « លោក Turner គឺជាអ្នកដឹកនាំដែល​មានការចូលរួមយ៉ាងខ្លាំង ប្តេជ្ញាចិត្ត មានភាព​ក្លាហាន មិនភ័យខ្លាច តែងតែមានឆន្ទៈគាំទ្រ​ក្រុម​ និងមាន​ភាព​ជឿជាក់។ គាត់គឺ​​ជា​មនុស្ស​ម្នាក់​ដែល​មាន​ស្មារតីដឹកនាំ​ CNN »។

ចំណែក លោក Wolf Blitzer អ្នក​សារព័ត៌មាន​នៅ​ CNN លើក​ឡើង​ថា​៖ « លោក Turner ប្រៀប​ដូច​ជា​រឿង​ព្រេងនិទាន​អ៊ីចឹង​ គាត់​បាន​ធ្វើបដិវត្តន៍អាជីវកម្ម​ទូរទស្សន៍ដោយ​បង្កើតប៉ុស្តិ៍​ព័ត៌មាន ២៤ម៉ោង​ដំបូងគេនៅទីនេះ​[CNN]។ យើងទាំងអស់គ្នា ​នៅទីនេះ​​ធ្វើបែប​នេះ​បាន​ដោយ​សារតែ Ted »។

ដោយ​ឡែក លោកស្រី​ Christiane Amanpour ជានិពន្ធ​នាយក​អន្តរ​ជាតិ​នៅ CNN ថា​៖ «គាត់​គឺ​ជា​មនុស្ស​អស្ចារ្យ​! គាត់ធ្វើឱ្យយើងទាំងអស់​គ្នាមាន​មោទនភាព មាន​សង្ឃឹម ហើយគាត់ធ្វើឱ្យ​យើងទាំងអស់គ្នា​ខិតខំ​ដល់​សព្វ​ថ្ងៃ​ ដើម្បីចក្ខុវិស័យមួយ​​​ធ្វើឱ្យ​ពិភពលោកកាន់តែប្រសើរឡើង»។

យ៉ាង​ណា ជាង​មួយខែមុនថ្ងៃ​ខួបកំណើតគម្រប់ ៨០ឆ្នាំ ក្នុង​ឆ្នាំ២០១៨ លោក Turner បង្ហាញថាគាត់មាន​ជំងឺ​ភ្លេច​ភ្លាំង​ Lewy ឬជំងឺវិវឌ្ឍន៍​ខួរក្បាល ​(មនុស្ស​មាន​វ័យ​ចំណាស់​)។

ថ្វី​ដ្បិត​តែ លោក Turner លាចាកលោក​ក៏​ដោយ បុរស​រូប​នេះ​បាន​បន្សល់ទុកកូន ៥នាក់ ចៅ ១៤នាក់ និង​ចៅទួត​២នាក់​៕

ប្រែសម្រួល៖ ណឺ មិនា