WHO ដាក់កំហិត ប្រទេសនីមួយៗត្រូវចាក់វ៉ាក់សាំងកូវីដឲ្យបានយ៉ាងតិច ១០ ភាគរយនៃចំនួនប្រជាជនរបស់ពួកគេនៅត្រឹមខែកញ្ញា

ប្រមុខអង្គការសុខភាពពិភពលោក (WHO) បានអំពាវនាវឲ្យប្រទេសនានា ចូលរួមសហការជាមួយការខិតខំរបស់ខ្លួន ដើម្បីធានាការចែកចាយវ៉ាក់សាំងជំងឺកូវីដ ១៩ ដោយស្មើភាពគ្នា ។ បច្ចុប្បន្ន WHO មានបំណងឲ្យប្រទេសនីមួយៗ ត្រូវចាក់វ៉ាក់សាំងឲ្យបានយ៉ាងតិច ១០ ភាគរយនៃចំនួនប្រជាជនរបស់ពួកគេ នៅត្រឹមខែកញ្ញា ។

លោក Tedros Adhanom Ghebreyesus អគ្គនាយក WHO បានថ្លែងបែបនេះនៅឯសន្និបាតប្រចាំឆ្នាំ របស់អង្គការដែលបានចាប់ផ្តើមធ្វើឡើង កាលពីថ្ងៃចន្ទក្នុងទ្រង់ទ្រាយតាមប្រព័ន្ធទូរគមនាគមន៍ ខណៈសមាជិកទាំងអស់របស់ខ្លួនចំនួន ១៩៤ នាក់ក៏បានចូលរួមផងដែរ ។

លោក Tedros បានកត់សម្គាល់ថា ជាង ៧៥ ភាគរយនៃវ៉ាក់សាំងទាំងអស់ ត្រូវបានចាក់ក្នុងប្រទេសចំនួន ១០ ប៉ុណ្ណោះ ។ លោកបានហៅបញ្ហានេះថាជា “វិសមភាពដ៏គួរឲ្យស្អប់ខ្ពើម” ហើយបាននិយាយថា វាកំពុងតែបង្កឲ្យមានជំងឺរាតត្បាត រហូតមកដល់ពេលនេះ ។

លោក Tedros ជំរុញឲ្យប្រទេសនានា ផ្តល់ជំនួយដល់កម្មវិធី COVAX ដែលជាក្របខ័ណ្ឌបង្កើតឡើង ដើម្បីចែកចាយវ៉ាក់សាំងដោយស្មើភាព ។

គួរបញ្ជាក់ថា សន្និបាតនេះ មានរយៈពេលរហូតដល់ ថ្ងៃអង្គារសប្តាហ៍ក្រោយ ។ អ្នកចូលរួមនឹងពិភាក្សា លើប្រធានបទរួមទាំងការស្រាវជ្រាវឯករាជ្យ លើវិធានការប្រឆាំងនឹងការឆ្លង របស់ប្រទេសនីមួយៗជាដើម ។

ទន្ទឹមនោះ ពួកគេក៏ត្រូវបានគេរំពឹងថា នឹងអនុម័តផែនការ ដើម្បីបង្កើនការត្រៀមលក្ខណៈជាអន្តរជាតិ ប្រឆាំងនឹងជំងឺឆ្លងថ្មីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ WHO បញ្ជាក់ច្បាស់ៗថា វ៉ាក់សាំងកូវីដ ដែលខ្លួនអនុម័ត មានប្រសិទ្ធិភាពប្រឆាំងនឹងវីរុសបំប្លែងខ្លួនគ្រប់ប្រភេទទាំងអស់

ចុចអាន ៖ WHO ថា តួលេខអ្នកស្លាប់ដោយកូវីដនៅទូទាំងពិភពលោក មានច្រើនជាង ២ ទៅ ៣ ដងនៃចំនួនបច្ចុប្បន្ន