ជប៉ុន រកឃើញករណីរលាកបេះដូង ក្រោយចាក់វ៉ាក់សាំង Pfizer តែក្រុមមន្ត្រីថា មិនមានផលប៉ះពាល់ធ្ងន់ធ្ងរឡើយ

ក្រសួងសុខាភិបាលប្រទេសជប៉ុន បាននិយាយថា មនុស្ស ៧ នាក់បានវិវត្តទៅជាជំងឺរលាកបេះដូង បន្ទាប់ពីពួកគេបានទទួលការចាក់វ៉ាក់សាំង Pfizer នៅក្នុងប្រទេស ។

ក្រុមមន្រ្តីបាននិយាយថា ប្រជាជនប្រមាណ ៩.៧៦ លាននាក់នៅក្នុងប្រទេសជប៉ុន បានទទួលការចាក់វ៉ាក់សាំង Pfizer គិតត្រឹមថ្ងៃទី ៣០ ខែឧសភា ។

ពួកគេនិយាយថា មនុស្ស ៧ នាក់ដែលមានអាយុពី ២០ ទៅ ៦៩ ឆ្នាំ បានវិវត្តទៅជាជំងឺរលាកបេះដូង ហើយ ៦ នាក់ គឺជាបុរសដែលបានបង្ហាញរោគសញ្ញា បន្ទាប់ពីទទួលការចាក់លើកទី ២ ។

មុនកើតមានករណីរលាកបេះដូងនៅជប៉ុន ក៏មានសេចក្តីរាយការណ៍នៅសហរដ្ឋអាមេរិក អំពីការរលាកបេះដូង ចំពោះអ្នកដែលបានទទួលវ៉ាក់សាំង Pfizer ឬ Moderna ដែលប្រើបច្ចេកវិទ្យា RNA ។

ភាគច្រើននៃករណីទាំងនេះ ត្រូវបានគេរាយការណ៍ថា រកឃើញនៅក្នុងបុរសវ័យក្មេង បន្ទាប់ពីទទួលការចាក់ដូសទី ២ ។

ទន្ទឹមនោះ ក្រសួងសុខាភិបាលជប៉ុននិយាយថា គ្មានការព្រួយបារម្ភ អំពីសុវត្ថិភាពធ្ងន់ធ្ងរណាមួយ ដែលត្រូវបានបញ្ជាក់ថា ប៉ះពាល់ដល់យុទ្ធនាការចាក់វ៉ាកសាំងនោះទេ ខណៈក្រុមមន្ត្រីនិយាយថា ពួកគេនឹងបន្តប្រមូលទិន្នន័យទាំងក្នុង និងក្រៅប្រទេស ពាក់ព័ន្ធនឹងបញ្ហានេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ច្បាស់ៗរោគសញ្ញារលាកបេះដូង ក្រោយចាក់វ៉ាក់សាំង Pfizer

ចុចអាន ៖ អ៉ីស្រាអែល​រក​ឃើញ​ករណី​រលាក​បេះ​ដូង​​តិច​តួច​ប្រហែល​​ពាក់​​ព័ន្ធ​នឹង​វ៉ាក់​សាំង​ Pfizer