ទាហានម៉ារីនអាមេរិកបន្ថែមទៀត នឹងទៅឈរជើងនៅ អូស្រ្តាលី

រដ្ឋមន្រ្តីក្រសួងការពារជាតិអូស្រ្តាលីបានបញ្ជាក់ថា ទាហានម៉ារីនអាមេរិកបន្ថែមទៀត នឹងត្រូវមកឈរជើងនៅភាគខាងជើងប្រទេសអូស្ត្រាលី ខណៈដែលលោកបានព្រមានអំពីពេលវេលាដ៏ស្មុគស្មាញ និងមិនអាចទាយទុកជាមុនបាន ខ្លាំងជាងពេលណាៗទាំងអស់ចាប់តាំងពីសង្គ្រាមលោកលើកទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាទៅកាន់សន្និសីទសន្តិសុខមួយក្នុងទីក្រុង កង់បេរ៉ា លោក Peter Dutton បានព្រមានថា មិនមែនប្រទេសទាំងអស់ កំពុងដើរតាមប្រទេសអូស្ត្រាលីនិងសម្ព័ន្ធមិត្តរបស់ខ្លួន ដោយផ្តល់អាទិភាពដល់សន្តិភាពនៅក្នុងតំបន់ឥណ្ឌូប៉ាស៊ីហ្វិកទេ។

លោក Dutton បានប្រាប់វិទ្យាស្ថានគោលនយោបាយយុទ្ធសាស្ត្រអូស្ត្រាលីថា “ក្តីរំពឹងអំពីជម្លោះយោធា គឺកាន់តែខិតមកជិត ខុសពីអតីតកាល ជាពិសេសតាមរយៈការគណនាខុសឬការយល់ច្រឡំ”។

ស្របពេលជាមួយគ្នានោះដែរ លោកបាននិយាយអំពីភាពចាំបាច់នៃទំនាក់ទំនងដែលគោរពគ្នាទៅវិញទៅមកជាមួយប្រទេសចិន ប៉ុន្តែលោកក៏បានលើកឡើងផងដែរថា អូស្រ្តាលីនឹងមិនទទួលយកឧទាហរណ៍នៃច្បាប់អន្ដរជាតិ ដែលត្រូវបានគេរំលោភបំពានឡើយ។

លោក Dutton លើកឡើងថា “ការទប់ស្កាត់ប្រកបដោយប្រសិទ្ធភាពគឺមានសារៈសំខាន់ខ្លាំងក្នុងការធានាថា អ្នកដែលព្យាយាមគំរាមកំហែងផលប្រយោជន៍របស់យើងត្រូវគិតឲ្យបានដិតដល់ខ្លាំងមែនទែន មុនពេលធ្វើដូច្នេះ”។

ផ្លូវដែលអាចទៅរួចមួយគឺ ការបង្កើនវត្តមានរបស់យោធាអាមេរិកនិងការការពារទ្រព្យសម្បត្តិការពារក្នុងទីក្រុង Darwin។

លោក Dutton អះអាងថា “ខ្ញុំគិតថានោះគឺជាផលប្រយោជន៍សន្តិសុខផ្ទាល់ខ្លួនរបស់យើង ហើយក៏ជាផលប្រយោជន៍របស់សហរដ្ឋអាមេរិកផងដែរ”៕

ប្រែសម្រួល៖ Vann Vann

ប្រភព៖ AFR