ម៉ាឡេស៊ី អនុម័តវ៉ាក់សាំងក្រុមហ៊ុនធំៗចំនួន ២ ក្នុងពេលតែមួយសម្រាប់ប្រើប្រាស់ជាបន្ទាន់ ក្រោយផ្ទុះឆ្លងខ្លាំងពេក

ក្រសួងសុខាភិបាលប្រទេសម៉ាឡេស៊ីបាននិយាយនៅថ្ងៃសុក្រនេះថា ខ្លួនបានផ្តល់ការយល់ព្រមតាមលក្ខខណ្ឌសម្រាប់ការប្រើប្រាស់ជាបន្ទាន់ នូវវ៉ាក់សាំងការពារជំងឺកូវីដ ១៩ ផលិតដោយក្រុមហ៊ុន Sinopharm របស់ប្រទេសចិន ។

អគ្គនាយកនៃអគ្គនាយកដ្ឋានសុខាភិបាលម៉ាឡេស៊ី លោក Noor Hisham Abdullah បាននិយាយនៅក្នុងសេចក្តីថ្លែងការណ៍មួយថា វ៉ាក់សាំង Sinopharm នៅក្នុងប្រទេសម៉ាឡេស៊ី ត្រូវបានចុះបញ្ជីដោយក្រុមហ៊ុនឱសថ Duopharma ។

ទន្ទឹមនោះ លោកវេជ្ជបណ្ឌិត Noor Hisham បានបញ្ជាក់ថា អាជ្ញាធរក៏បានផ្តល់ការយល់ព្រមតាមលក្ខខណ្ឌចំពោះវ៉ាក់សាំងចាក់តែមួយដូស Janssen ដែលផលិតដោយក្រុមហ៊ុនឱសថអាមេរិក Johnson & Johnson និងផលិតនៅក្នុងប្រទេសបែលហ្ស៊ិក ។

ការអនុម័តនេះធ្វើឡើងមួយថ្ងៃ បន្ទាប់ពីក្រសួងសុខាភិបាលប្រទេសម៉ាឡេស៊ី បាននិយាយថា ខ្លួននឹងបញ្ឈប់ការចាក់វ៉ាក់សាំង Sinovac នៅពេលដែលការផ្គត់ផ្គង់របស់ក្រុមហ៊ុនចិនមួយនេះចប់ ខណៈប្រទេសនេះមានវ៉ាក់សាំងផ្សេងទៀតគ្រប់គ្រាប់ សម្រាប់ចាក់ដល់ប្រជាជនខ្លួន ។

គួរបញ្ជាក់ថា ប្រទេសម៉ាឡេស៊ី បានចាប់ផ្តើមយុទ្ធនាការចាក់វ៉ាក់សាំងការពារជំងឺកូវីដ ១៩ កាលពីថ្ងៃទី ២៤ ខែកុម្ភៈ ខណៈគិតត្រឹមថ្ងៃព្រហស្បតិ៍ ប្រទេសនេះបានចាក់វ៉ាក់សាំងការពារជំងឺកូវីដ ១៩ សរុប ១២,៦៤៧,៥៥៨ ដូស ក្នុងចំណោមប្រជាជនជាង ៤ លាននាក់ ឬ ១២.៣ ភាគរយនៃប្រជាជន បានចាក់វ៉ាក់សាំងពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ម៉ាឡេស៊ី រកឃើញអ្នកឆ្លងកូវីដ ក្នុងកម្រិតបំបែកកំណត់ត្រា ៣ថ្ងៃជាប់គ្នា