WHO រកឃើញវ៉ាក់សាំង AstraZeneca របស់ឥណ្ឌា ក្លែងក្លាយ

អង្គការសុខភាពពិភពលោក (WHO) បាននិយាយថា ខ្លួនបានរកឃើញ Version ក្លែងក្លាយនៃវ៉ាក់សាំង Covishield របស់ប្រទេសឥណ្ឌា។

យោងតាមសេចក្តីថ្លែងការណ៍របស់ WHO, វ៉ាក់សាំងទាំងនេះ ត្រូវបានរឹបអូសដោយអាជ្ញាធរក្នុងប្រទេសឥណ្ឌានិងអាហ្វ្រិក នៅចន្លោះខែកក្កដាដល់ខែសីហា។

WHO ក៏បាននិយាយផងដែរថា អ្នកផលិតវ៉ាក់សាំងគឺវិទ្យាស្ថាន Serum របស់ឥណ្ឌាបានបញ្ជាក់ថា ដូសទាំងនោះពិតជាក្លែងក្លាយមែន។

WHO ព្រមានថា វ៉ាក់សាំងក្លែងក្លាយ បង្កហានិភ័យធ្ងន់ធ្ងរណាស់ដល់សុខភាពសាធារណៈពិភពលោក។ ខ្លួនបានអំពាវនាវឲ្យមានការដកវ៉ាក់សាំងទាំងនេះ ចេញពីការធ្វើចរាចរណ៍។

មិនមានសេចក្តីថ្លែងការណ៍ផ្លូវការណាមួយពីរដ្ឋាភិបាលឥណ្ឌាទេ ប៉ុន្តែរបាយការណ៍ក្នុងស្រុកបាននិយាយថា ក្រសួងសុខាភិបាលរបស់ប្រទេស កំពុងស៊ើបអង្កេតបញ្ហានេះ។

Covishield គឺជា Version ឥណ្ឌារបស់វ៉ាក់សាំង AstraZeneca និងជាវ៉ាក់សាំងដែលត្រូវបានប្រើប្រាស់យ៉ាងទូលំទូលាយបំផុតនៅក្នុងប្រទេសឥណ្ឌា ដោយមកដល់ពេលនេះមានការចាក់បាន ៤៨៦លានដូសហើយ។

វិទ្យាស្ថាន Serum បានផ្គត់ផ្គង់វ៉ាក់សាំង Covishield រាប់លានដូស ដល់បណ្តាប្រទេសនៅអាស៊ី អាហ្វ្រិកនិងអាមេរិកខាងត្បូង ដែលជាផ្នែកមួយនៃកិច្ចព្រមព្រៀងជាមួយរដ្ឋាភិបាលផ្សេងៗនិងគម្រោង Covax សកលសម្រាប់ប្រទេសក្រីក្រ។

ឥណ្ឌា ក៏បានបញ្ជូនវ៉ាក់សាំង Covishield ទៅប្រទេសជិតខាងរបស់ខ្លួនផងដែរ ដែលជាផ្នែកមួយនៃគោលនយោបាយ “វ៉ាក់សាំងការទូត” របស់លោកនាយករដ្ឋមន្រ្តី Narendra Modi៕

ប្រែសម្រួល៖ Vann Vann

ប្រភព៖ BBC

ចុចអាន៖ លួចកាតចាក់វ៉ាក់សាំងពី CDC ទៅលក់ ឱសថការីអាមេរិក ប្រឈមជាប់ពន្ធនាគារ ១២០ឆ្នាំ