លួចកាតចាក់វ៉ាក់សាំងពី CDC ទៅលក់ ឱសថការីអាមេរិក ប្រឈមជាប់ពន្ធនាគារ ១២០ឆ្នាំ

អាជ្ញាធរបានចាប់ខ្លួនឱសថការីម្នាក់នៅទីក្រុងឈីកាហ្គោ កាលពីថ្ងៃអង្គារ ពីបទលក់កាតចាក់វ៉ាក់សាំងការពារជំងឺកូវីដ-១៩ រាប់សិបសន្លឹកនៅលើ eBay។

ក្រសួងយុត្តិធម៌បាននិយាយនៅក្នុងសេចក្តីប្រកាសព័ត៌មានថា លោក Tangtang Zhao អាយុ ៣៤ ឆ្នាំ ត្រូវបានចោទប្រកាន់ពីបទលក់កាតពិតប្រាកដចំនួន ១២៥ សន្លឹកដល់អ្នកទិញចំនួន ១១ នាក់នៅក្នុងខែមីនានិងមេសា ដែលកាតទាំងនេះ ត្រូវបានគាត់លួចពីមជ្ឈមណ្ឌលគ្រប់គ្រងនិងបង្ការជំងឺ (CDC)។

យោងតាមក្រសួង គាត់បានគិតថ្លៃអតិថិជនប្រហែល១០ដុល្លារ ក្នុងមួយកាត។

ក្រសួងនិយាយថា លោក Zhao ទទួលបានកាតទាំងនេះ តាមរយៈការងាររបស់គាត់ជាឱសថការីដែលមានអាជ្ញាប័ណ្ណធ្វើការឲ្យក្រុមហ៊ុនមួយ ដែលចែកចាយនិងគ្រប់គ្រងវ៉ាក់សាំងការពារជំងឺកូវីដ-១៩ នៅតាមទីតាំងទូទាំងប្រទេស។

ភ្នាក់ងារពិសេស Emmerson Buie Jr. នៅការិយាល័យឈីកាហ្គោរបស់ FBI បានឲ្យដឹងថា “ការលក់កាតចាក់វ៉ាក់សាំងការពារជំងឺកូវីដ-១៩ ដល់បុគ្គលដែលមិនទាន់ចាក់វ៉ាក់សាំង បានធ្វើឲ្យជនជាតិអាមេរិករាប់លាននាក់ ប្រឈមនឹងគ្រោះថ្នាក់ធ្ងន់ធ្ងរឬស្លាប់”។

ការដាក់តម្លៃទាបបែបនេះចំពោះសុវត្ថិភាពរបស់ជាតិយើង មិនត្រឹមតែជាការប្រមាថដល់អ្នកដែលកំពុងចូលរួមចំណែកក្នុងការប្រយុទ្ធដើម្បីបញ្ឈប់ជំងឺកូវីដ-១៩ប៉ុណ្ណោះទេ ប៉ុន្តែក៏ជាឧក្រិដ្ឋកម្មសហព័ន្ធដែលមានផលវិបាកធ្ងន់ធ្ងរផងដែរ”។

លោក Zhao ត្រូវបានចោទប្រកាន់ពីបទលួចទ្រព្យសម្បត្តិរដ្ឋចំនួន ១២ ករណី។ គាត់អាចត្រូវបានផ្តន្ទាទោសឲ្យជាប់ពន្ធនាគាររយៈពេល ១០ ឆ្នាំចំពោះមួយករណី ដែលនេះមានន័យថា គាត់អាចពន្ធនាគាររហូតដល់ទៅ១២០ឆ្នាំ ប្រសិនបើត្រូវបានផ្តន្ទាទោស៕

ប្រែសម្រួល៖ Vann Vann

ប្រភព៖ WVLT

ចុចអាន៖ ដំណឹងល្អ! វ៉ាក់សាំងថ្មី ការពារវីរុសកូវីដបំប្លែងខ្លួនច្រើនប្រភេទ ធ្វើតេស្តដំណាក់កាលដំបូង ទទួលបានជោគជ័យ