គ្រោះមហន្តរាយទាក់ទងនឹងអាកាសធាតុ សម្លាប់មនុស្សជាង ១៧,០០០ នាក់ចាប់តាំងពីកូវីដ ផ្ទុះឡើង

គ្រោះមហន្តរាយទាក់ទងនឹងអាកាសធាតុ បានប៉ះពាល់ដល់ជីវិតមនុស្សជិត ១៤០ លាននាក់និងបានសម្លាប់មនុស្សចំនួន ១៧,២៤២ នាក់ ចាប់តាំងវិបត្តិជំងឺកូវីដ-១៩ផ្ទុះឡើង។ នេះបើយោងតាមរបាយការណ៍ដែលបានចេញផ្សាយកាលពីថ្ងៃព្រហស្បតិ៍។

សហព័ន្ធកាកបាទក្រហមនិងអឌ្ឍចន្ទក្រហមអន្តរជាតិ (IFRC) និងមជ្ឈមណ្ឌលអាកាសធាតុអឌ្ឍចន្ទក្រហមកាកបាទក្រហមបាននិយាយថា មនុស្សជាង ៦៥៨ លាននាក់ផ្សេងទៀត ត្រូវងគ្រោះដោយសារបញ្ហាសីតុណ្ហភាពមិនធម្មតា។

ប្រធាន IFRC លោក Francesco Rocca បាននិយាយក្នុងសន្និសីទសារព័ត៌មានមួយ នៅទីក្រុងញូវយ៉កថា “ពិភពលោកកំពុងប្រឈមមុខនឹងវិបត្តិមនុស្សធម៌ដែលមិនធ្លាប់មានពីមុនមក ដែលការប្រែប្រួលអាកាសធាតុនិងកូវីដ-១៩ កំពុងជំរុញសហគមន៍នានាឲ្យឈានដល់កម្រិតកំណត់របស់ពួកគេ”។

លោកបានបន្ថែមថា “មុនឈានដល់កិច្ចប្រជុំកំពូល COP26 យើងសូមជំរុញដល់មេដឹកនាំពិភពលោក ចាត់វិធានការជាបន្ទាន់ មិនត្រឹមតែកាត់បន្ថយការបញ្ចេញឧស្ម័នផ្ទះកញ្ចក់ប៉ុណ្ណោះទេ ប៉ុន្តែក៏ដើម្បីដោះស្រាយផលប៉ះពាល់មនុស្សធម៌ដែលមានស្រាប់ និងជិតមកដល់បណ្តាលមកពីការប្រែប្រួលអាកាសធាតុផងដែរ”។

គួរបញ្ជាក់ថា សន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិឆ្នាំ២០២១ ដែលត្រូវបានគេស្គាល់ថា COP26 នឹងប្រព្រឹត្តទៅក្នុងទីក្រុង Glasgow ប្រទេសស្កុតឡែន នៅចន្លោះថ្ងៃទី ៣១ ខែតុលាដល់ថ្ងៃទី ១១ ខែវិច្ឆិកា ឆ្នាំ២០២១៕

ប្រែសម្រួល៖ Vann Vann

ប្រភព៖ Anadolu

ចុចអាន៖ គ្រោះមហន្តរាយផ្លូវទឹក! ស្រឡាងបុកកប៉ាល់ដឹកទំនិញ ស្លាប់មនុស្ស២៦នាក់នៅ បង់ក្លាដែស