វេបសាយភ្នាល់បាល់វៀតណាមមួយមានទឹកប្រាក់ជាង ៨ លានដុល្លារ ត្រូវប៉ូលិសបង្ក្រាប

ប៉ូលិសវៀតណាម បានបង្ក្រាបទីតាំងភ្នាល់បាល់តាមអ៊ីនធើណិតមួយកន្លែង ដែលមានប្រតិបត្តិការតម្លៃជាង ២០០ ពាន់លានដុង (៨.៧លានដុល្លារអាមេរិក)។

មន្រ្តីនៅក្រោមនាយកដ្ឋានសន្តិសុខសាធារណៈនៃខេត្ត Ha Giang ភាគខាងជើង បានបញ្ជាក់កាលពីថ្ងៃចន្ទថា ពួកគេបានចាប់ខ្លួនសមាជិកចំនួន១៤នាក់ ដែលមានអាយុពី ២៦ ដល់ ៣៩ ឆ្នាំ ពីបទលេងល្បែងស៊ីសងនិងរៀបចំល្បែងស៊ីសង។

ការចាប់ខ្លួននេះត្រូវបានធ្វើឡើងបន្ទាប់ពីប៉ូលិស Ha Giang ដោយមានការសម្របសម្រួលជាមួយក្រសួងសន្តិសុខសាធារណៈ បានឆ្មក់ចូលផ្ទះជនសង្ស័យកាលពីល្ងាចថ្ងៃអាទិត្យ។

ក្រុមមន្រ្តីក៏បានរឹបអូសរថយន្តចំនួន ៤ គ្រឿង, ទូរស័ព្ទដៃ ២៤ គ្រឿង និង flash drive ចំនួន ៣ ដែលមានផ្ទុកទិន្នន័យប្រតិបត្តិការពីគណនីភ្នាល់បាល់ផងដែរ។

ការស៊ើបអង្កេតបឋមបានបង្ហាញថា សមាជិកក្រុមនេះ បានបង្កើតគណនីជាច្រើននៅលើគេហទំព័រ bongda88.com និងចែកចាយដល់អ្នកលេងល្បែង។

ទោះបីជាយ៉ាងណាក៏ដោយ ការស៊ើបអង្កេតបន្ថែមកំពុងធ្វើឡើង៕

ប្រែសម្រួល៖ Vann Vann

ប្រភព៖ Tuoi Tre