ព័ត៌មានអន្ដរជាតិ

មីយ៉ាន់ម៉ា កាន់ទុក្ខមួយសប្តាហ៍ ខណៈរកឃើញមនុស្សស្លាប់ដោយរញ្ជួយដី ច្រើនឡើងៗ

បានផុស

១ year មុន

នៅ

ថ្ងៃអង្គារ ១ មេសា ២០២៥

ដោយ

បន្ទាប់ពីសោកនាដកម្មគ្រោះរញ្ជួយដីដ៏បំផ្លិចបំផ្លាញបំផុតសម្លាប់មនុស្សជាង៣ ០០០នាក់, ប្រទេសមីយ៉ាន់ម៉ា បានប្រកាសកាន់ទុក្ខថ្នាក់ជាតិរយៈពេល១សប្តាហ៍ ពោលគឺរហូតដល់ថ្ងៃទី៦ខែមេសា ដោយទង់ជាតិត្រូវបង្ហូតពាក់កណ្តាលដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របបយោធាក៏ប្រកាសដែរថា នៅថ្ងៃអង្គារទី១ខែមេសា នឹងមានការស្មិងស្មាធិ៍រយៈពេល១នាទី ដើម្បីរម្លឹកឧទ្ទិសដល់វិញ្ញាណក្ខន្ធជនរងគ្រោះដែលបាត់បង់ជីវិត ដោយគ្រោះរញ្ជួយដីដ៏សាហាវនេះ។

សេចក្តីប្រកាសនេះធ្វើឡើង ស្របពេលក្រុមជួយសង្គ្រោះបានរកឃើញមនុស្សស្លាប់កាន់តែច្រើនទៅៗ នៅក្នុងគំនរអគារបាក់រលំ ខណៈបើយោងតាមការចុះផ្សាយរបស់សមាគមសំឡេងប្រជាធិបតេយ្យភូមា តួលេខមនុស្សស្លាប់បានកើនឡើងដល់ ៣ ០៣៤នាក់ហើយ។

ការបំផ្លិចបំផ្លាញដោយរញ្ជួយដីនៅមីយ៉ាន់ម៉ា (រូបថត៖ AP)

តួលេខបន្ថែមនេះ ត្រូវបានកត់ត្រាបន្ទាប់ពីក្រុមសង្គ្រោះបានទាញសាកសពចំនួន ១ ៨០៧នាក់ ចេញពីគំនរបាក់បែកនៃអគារដែលដួលរលំនៅទីក្រុង Mandalay។

សូមជម្រាបថា គ្រោះរញ្ជួយដីកម្រិត ៧.៧រ៉ិចទ័រដែលវាយប្រហារកាលពីថ្ងៃសុក្រទី២៨ខែមីនា បានបង្កការបំផ្លិចបំផ្លាញយ៉ាងសម្បើមនៅទូទាំងភាគកណ្តាលប្រទេសមីយ៉ាន់ម៉ា ដោយទីក្រុង Mandalay ទទួលរងនូវការខូចខាតយ៉ាងធ្ងន់ធ្ងរបំផុត។

ក្រុមអ្នកសង្គ្រោះបន្ទាន់កំពុងប្រជែងនឹងពេលវេលាដើម្បីស្វែងរកអ្នកនៅរស់ដែលជាប់នៅក្រោមសំណង់អគារដែលដួលរលំ ខណៈការរញ្ជួយដីនៅតែបន្តអង្រួនក្នុងតំបន់។

ប្រទេសជាច្រើនបានបញ្ជូនក្រុមជួយសង្គ្រោះនិងជំនួយមនុស្សធម៌ទៅមីយ៉ាន់ម៉ាដូចជា ចិន ឥណ្ឌា រុស្ស៊ី វៀតណាម កូរ៉េខាងត្បូង ជប៉ុន ថៃ ឥណ្ឌូណេ ស៊ីម៉ាឡេស៊ី នូវែលសេឡង់ សិង្ហបុរី ហ្វីលីពីន និងកោះតៃវ៉ាន់។ កិច្ចខិតខំប្រឹងប្រែងអន្តរជាតិទាំងនេះ គឺមានគោលបំណងពង្រឹងសមត្ថភាពរបស់ប្រទេសមីយ៉ាន់ម៉ាក្នុងការឆ្លើយតបទៅនឹងគ្រោះមហន្តរាយនិងផ្តល់ជំនួយដែលត្រូវការជាចាំបាច់ដល់សហគមន៍ដែលរងផលប៉ះពាល់៕

អត្ថបទ៖ សុខ សុវណ្ណ

ចុចអាន៖ អ្នកស្លាប់ព្រោះរញ្ជួយដីនៅមីយ៉ាន់ម៉ា មានលើសពី ៣ ០០០នាក់ហើយ