អ៊ុយក្រែន អាចមិនចូល ណាតូ ដើម្បីបញ្ចៀសសង្គ្រាម

អ៊ុយក្រែនអាចនឹង បញ្ឈប់ការប៉ុនប៉ងរបស់ខ្លួនក្នុងការចូលរួមជាមួយអង្គការណាតូ ដើម្បីបញ្ចៀសសង្គ្រាមជាមួយរុស្ស៊ី។ នេះបើតាមសម្តីឯកអគ្គរដ្ឋទូតអ៊ុយក្រែនប្រចាំ ចក្រភពអង់គ្លេស។

លោកឯកអគ្គរដ្ឋទូត Vadym Prystaiko បានប្រាប់ BBC ថា អ៊ុយក្រែនមានឆន្ទៈបត់បែនលើគោលដៅរបស់ខ្លួន ដើម្បីចូលរួមសម្ព័ន្ធភាពយោធាអាត្លង់ទិក ដែលទង្វើបែបនេះ ត្រូវបានប្រធានាធិបតីរុស្ស៊ី លោក វ្ល៉ាឌីមៀរ ពូទីន និយាយថា នឹងក្លាយជាការបង្កឲ្យមានសង្រ្គាម។

នៅពេលសួរថា តើរដ្ឋាភិបាលទីក្រុង គៀវ អាចផ្លាស់ប្តូរជំហររបស់ខ្លួនលើសមាជិកភាពរបស់អង្គការណាតូដែរឬទេ លោក Prystaiko បានឆ្លើយថា “ប្រហែលជាអាច ជាពិសេសពេលត្រូវរងការគំរាមកំហែងដូចនេះ”។

គួរបញ្ជាក់ថា អ៊ុយក្រែនមិនមែនជាសមាជិកណាតូទេ ប៉ុន្តែមានការសន្យាតាំងពីឆ្នាំ២០០៨មកថា ខ្លួននឹងផ្តល់ឱកាសឲ្យចូលរួម ដែលនេះនឹងនាំសម្ព័ន្ធភាពដឹកនាំដោយសហរដ្ឋអាមេរិកមួយនេះ ឆ្ពោះទៅកាន់ព្រំដែនរុស្ស៊ី។

លោក ពូទីន និយាយថា ទំនាក់ទំនងដែលកាន់តែស្អិតរមួតរវាងអ៊ុយក្រែនជាមួយសម្ព័ន្ធភាពនេះ អាចធ្វើឲ្យអ៊ុយក្រែនក្លាយជាទីតាំងបាញ់មីស៊ីលរបស់អង្គការណាតូ សំដៅទៅលើប្រទេសរុស្ស៊ី។ លោក​និយាយ​ថា រុស្សី​ត្រូវ​ដាក់​បន្ទាត់​ក្រហម ដើម្បី​ទប់ស្កាត់​បញ្ហា​នោះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ បែកធ្លាយផែនការសម្ងាត់! រុស្ស៊ី នឹងវាយចូលអ៊ុយក្រែន នៅថ្ងៃពុធនេះ រួមទាំងទម្លាក់គ្រាប់បែកផងដែរ