មីស៊ីលធ្លាក់ចំសាលាមត្តេយ្យអ៊ុយក្រែន ធ្វើឲ្យស្ថានការណ៍កាន់តែក្តៅ (មានវីដេអូ)

ភាពតានតឹងនៅភាគខាងកើតប្រទេសអ៊ុយក្រែន បានកើនឡើងកាន់តែខ្លាំង បន្ទាប់ពីក្រុមបំបែកខ្លួនគាំទ្រដោយរុស្ស៊ី បាញ់មីស៊ីលឆ្លងកាត់ខ្សែបន្ទាត់ គ្រប់គ្រងដោយកងកម្លាំងអ៊ុយក្រែន ដោយគ្រាប់បានធ្លាក់ចំសាលាមត្តេយ្យមួយ និងបណ្តាលឲ្យមនុស្សបីនាក់រងរបួស។

យោងតាមអង្គការសន្តិសុខ និងសហប្រតិបត្តិការនៅអឺរ៉ុប (OSCE) បានឲ្យដឹងថា មានឧប្បត្តិហេតុបាញ់ផ្លោងជាច្រើនកាលពីព្រឹកថ្ងៃព្រហស្បតិ៍ទី១៧ខែកុម្ភៈ ឆ្លងកាត់ខ្សែបន្ទាត់ព្រំដែននៅក្នុងតំបន់ Donbas។

ការវាយប្រហារលើទីក្រុង Stanytsia Luhanska បានបង្កការខូចខាតដល់សាលាមត្តេយ្យលេខ ២១។ ថ្ងៃសិក្សាទើបតែចាប់ផ្តើមប៉ុណ្ណោះ នៅពេលមានគ្រាប់ផ្លោងធ្លាក់លើអគារនៅផ្លូវ Depovska។

គ្រូ​បង្រៀនម្នាក់ និង​សន្តិសុខ​ម្នាក់​ត្រូវ​របួសខណៈយោធាអ៊ុយក្រែននិយាយថា គ្រាប់ផ្លោងរហូតដល់ទៅ៣២គ្រាប់ឯណោះ បានធ្លាក់លើទីក្រុងទាំងមូល ថែមទាំងធ្វើឲ្យមន្ត្រីម្នាក់រងរបួស និងរំខានដល់ការផ្គត់ផ្គង់អគ្គិសនីផងដែរ។

ការវាយប្រហារនេះ គឺជាផ្នែកមួយនៃការបាញ់ផ្លោងជាបន្តបន្ទាប់ពីសំណាក់ក្រុមបំបែកខ្លួនដែលគាំទ្ររុស្ស៊ីនៅក្នុងទីតាំងជាច្រើន ទូទាំងខ្សែត្រៀមជួរមុខប្រវែង២៥០គីឡូម៉ែត្រ។

ការ​វាយ​ប្រហារ​ទំនង​ជា​នឹង​បន្តមកដល់ថ្ងៃសុក្រនេះ ខណៈមាន​សេចក្តី​រាយការណ៍​ពី​ការ​បាញ់​ផ្លោង​បន្ថែម​ទៀត​លើ​ទីក្រុង។

ប្រធានាធិបតីអ៊ុយក្រែនលោក Volodymyr Zelenskiy បានចោទប្រកាន់ភាគីរុស្ស៊ីពីអាកប្បកិរិយា “បង្កហេតុ” ស្របពេលប្រធានាធិបតីអាមេរិកលោក Joe Biden បានព្រមានថា ការវាយប្រហាររបស់រុស្ស៊ីលើអ៊ុយក្រែននៅតែអាចទៅរួច ហើយអាចកើតឡើងក្នុងរយៈពេលប៉ុន្មានថ្ងៃខាងមុខនេះ៕

សូមទស្សនាវីដេអូ៖

A video taken from inside the targeted kindergarten building. pic.twitter.com/hCpOoWCkhA

— Illia Ponomarenko (@IAPonomarenko) February 17, 2022

ប្រែសម្រួល៖ Vann Vann

ប្រភព៖ The Guardian

ចុចអាន៖ រុស្ស៊ី បន្ថែម កងទ័ព ៧ពាន់ នាក់ ទៀតទៅ ជិត ព្រំដែន អ៊ុយក្រែន ផ្ទុយពីការអះអាងរបស់ ពូទីន