ត្រាំ ប្រកាសក្តែងៗ បើលោកជាប្រធានាធិបតីវិញ នឹងបញ្ជូនរបស់ម្យ៉ាងនេះទៅ រុស្ស៊ី ដើម្បីគំរាម ពូទីន

អតីតប្រធានាធិបតី ដូណាល់ ត្រាំ បាននិយាយកាលពីថ្ងៃចន្ទទី២១ខែមីនាថា សហរដ្ឋអាមេរិកគួរតែគំរាមប្រធានាធិបតីរុស្ស៊ី លោក វ្ល៉ាឌីមៀរ ពូទីន តាមរយៈការបញ្ជូននាវាមុជទឹកនុយក្លេអ៊ែររបស់ខ្លួន ទៅកាន់ឆ្នេរសមុទ្រ រុស្ស៊ី។

ដោយសំដៅលើការពិភាក្សារបស់គាត់ជាមួយលោក ពូទីន ក្នុងអំឡុងពេលកាន់តំណែង លោក ត្រាំ បាននិយាយក្នុងកម្មវិធី Fox Business ថា “ខ្ញុំបានស្តាប់គាត់ជានិច្ចដោយប្រើ n-word ហើយពាក្យនោះគឺ នុយក្លេអ៊ែរ ដែលគាត់តែងតែប្រើ”។

គាត់គឺជាអំណាចនុយក្លេអ៊ែរ ប៉ុន្តែយើងគឺជាមហាអំណាចនុយក្លេអ៊ែរ។ យើងមាននាវាមុជទឹកដ៏អស្ចារ្យបំផុតនៅក្នុងពិភពលោក ដែលជាម៉ាស៊ីនមានឥទ្ធិពលបំផុតមិនធ្លាប់មាន។

លោក ត្រាំ លើកឡើងថា “លោក បៃដិន គួរតែនិយាយថា ប្រសិនបើអ្នកនិយាយពាក្យនុយក្លេអ៊ែរម្ដងទៀត យើងនឹងបញ្ជូននាវាមុជទឹកនុយក្លេអ៊ែរទៅ ហើយយើងនឹងធ្វើដំណើរទៅមកតាមឆ្នេរសមុទ្ររបស់អ្នក។ អ្នកមិនអាចទុកឲ្យសោកនាដកម្មនេះបន្តបានទេ។ អ្នកមិនអាចទុកឲ្យមនុស្សរាប់ពាន់នាក់ ស្លាប់បានទេ”។

បច្ចុប្បន្ន សហរដ្ឋអាមេរិកមានកងនាវា ដែលមាននាវាមុជទឹកបាញ់មីស៊ីលផ្លោងថ្នាក់ Ohio ចំនួន១៤គ្រឿង ដែលត្រូវបានរចនាឡើងជាពិសេសសម្រាប់ការបំបាំងកាយ និងការបញ្ជូនក្បាលគ្រាប់នុយក្លេអ៊ែរទៅគោលលដៅជាក់លាក់។

គួរបញ្ជាក់ថា កាលពីថ្ងៃទី២៧ខែកុម្ភៈ លោក ពូទីន បានបញ្ជាឲ្យកងកម្លាំងនុយក្លេអ៊ែររបស់រុស្ស៊ី ត្រូវមានការប្រុងប្រយ័ត្នខ្ពស់ ក្នុងការឆ្លើយតបទៅនឹងអ្វីដែលលោកបាននិយាយថា ជា “ទណ្ឌកម្មរបស់លោកខាងលិចខុសច្បាប់” ដែលបានដាក់ បន្ទាប់ពីការលុកលុយនៅប្រទេសអ៊ុយក្រែន៕

ប្រែសម្រួល៖ Vann Vann

ប្រភព៖ Business Insider

ចុចអាន៖ លោក Zelensky៖ កិច្ចព្រមព្រៀងសន្តិភាពជាមួយរុស្ស៊ី ត្រូវតែឆ្លងកាត់ការធ្វើប្រជាមតិនៅ អ៊ុយក្រែន ដើម្បីឲ្យប្រជាជនថ្លឹងថ្លែង