អ្នកទៅ អឺរ៉ុប លែងតម្រូវឲ្យពាក់ម៉ាសនៅលើយន្តហោះហើយ

ចាប់ពីថ្ងៃទី ១៦ ខែឧសភា សហភាពអឺរ៉ុបនឹងលែងតម្រូវឲ្យអ្នកដំណើរពាក់ម៉ាសនៅក្នុងអាកាសយានដ្ឋាន និងនៅលើយន្តហោះទៀតហើយ ។

ទីភ្នាក់ងារសុវត្ថិភាពអាកាសចរណ៍របស់សហភាពអឺរ៉ុប (EASA) បាននិយាយថា ការសម្រេចចិត្តនេះគឺផ្អែកលើកត្តាជាច្រើនរួមទាំងកម្រិតនៃការចាក់វ៉ាក់សាំងបង្ការ ក៏ដូចជាការបន្ធូរបន្ថយការរឹតបន្តឹងលើមេរោគឆ្លងនៅក្នុងបណ្តាប្រទេសអឺរ៉ុបជាដើម ។

ទន្ទឹមនោះនាយកប្រតិបត្តិរបស់ EASA លោក Patrick Ky បាននិយាយថា “សម្រាប់អ្នកដំណើរ និងអ្នកបើកយន្តហោះ នេះគឺជាជំហានដ៏ធំមួយឆ្ពោះទៅរកប្រក្រតីភាពនៃការធ្វើដំណើរតាមផ្លូវអាកាស” ។

យ៉ាង​ណា​មិញ អាជ្ញាធរ​ក្នុង​សហភាព​អឺរ៉ុប​នៅ​តែ​ជឿ​ជាក់​ថា ការពាក់ម៉ាសនៅតែ​ជា​វិធានការ​ដ៏​សំខាន់​ក្នុង​ការ​ការពារ​ការ​ឆ្លង​មេរោគ ហើយមនុស្ស​គួរ​តែពាក់ម៉ាស​នៅ​ពេលណា​ដែល​ក្រុមហ៊ុន​អាកាសចរណ៍​ស្នើឲ្យ​ធ្វើ​ដូច្នេះ ។

គួរបញ្ជាក់ថា រហូតមកដល់ពេលនេះប្រទេសជាច្រើននៅអឺរ៉ុបបានបញ្ចប់កាតព្វកិច្ចពាក់ម៉ាសហើយ ខណៈប្រទេសបារាំងក៏នឹងលុបចោលកាតព្វកិច្ចពាក់ម៉ាសសម្រាប់ការដឹកជញ្ជូនសាធារណៈនៅថ្ងៃទី ១៦ ខែឧសភា ប៉ុន្តែច្បាប់នេះនឹងនៅតែអនុវត្តសម្រាប់កន្លែងមួយចំនួនតូច រួមទាំងនៅមន្ទីរពេទ្យផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK