អ៊ុយក្រែន ថា សមាជិកណាតូមួយនេះជាប្រទេសដោះស្រាយជម្លោះជោគ ជ័យបំផុត

អ្នកការទូតកំពូលរបស់អ៊ុយក្រែនបាននិយាយកាលពីថ្ងៃព្រហស្បតិ៍ថា តួកគីគឺជាប្រទេសជោគជ័យបំផុតក្នុងការសម្រុះសម្រួល និងដោះស្រាយជម្លោះសម្រាប់ប្រទេសទាំងអស់ ជាពិសេសគឺកំពុងសម្របសម្រួលដើម្បីឲ្យមានការបញ្ចប់សង្គ្រាមរវាងអ៊ុយក្រែន និងរុស្ស៊ី ។

រដ្ឋមន្ត្រីការបរទេសអ៊ុយក្រែនលោក Dmytro Kuleba បាន​ថ្លែង​នៅ​ក្នុង​វេទិកា​សេដ្ឋកិច្ច​ពិភពលោក (WEF) ក្នុង​ទីក្រុង Davos ប្រទេស​ស្វីសថា តួកគីជាប្រទេសសមាជិកអង្គការណាតូមានកម្រិតស្តង់ដារខ្ពស់បំផុតក្នុងដំណើរការចរចារវាងរុស្ស៊ី និងអ៊ុយក្រែន ។

លោក Kuleba បាននិយាយថា ទាំងកិច្ចប្រជុំជាន់ខ្ពស់លើកទី ១ និងចុងក្រោយបង្អស់របស់រដ្ឋមន្ត្រីការបរទេសអ៊ុយក្រែន និងរុស្ស៊ី គឺមានខ្ញុំ Kuleba និងលោក Sergey Lavrov ដែលបានធ្វើឡើងកាលពីថ្ងៃទី ១០ ខែមីនា នៅខាងក្រៅវេទិកាការទូត Antalya របស់ប្រទេសតួកគី ខណៈនៅថ្ងៃទី ២៩ ខែមីនា អ្នកចរចាមកពីប្រទេសទាំងពីរក៏បានជួបប្រជុំគ្នាទៀតនៅទីក្រុងអ៊ីស្តង់ប៊ុល ។

លោក Kuleba បានប្រាប់សារព័ត៌មាន Anadolu ថា អ៊ុយក្រែនមិនដែលបដិសេធមិនព្រមបន្តការចរចាជាមួយរុស្ស៊ីនោះទេ ហើយទីក្រុងកៀវក៏បានត្រៀមខ្លួនសម្រាប់ការចរចាជាមួយទីក្រុងមូស្គូផងដែរ ប៉ុន្តែចំណុចមួយដែលអ៊ុយក្រែនបដិសេធនោះគឺមិនទទួលយកឱសានវាទណាមួយរបស់រុស្ស៊ីឡើយ ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ហៅថាជា “ប្រតិបត្តិការយោធាពិសេស” បានអូសបន្លាយពេលជាង ៣ ខែហើយ បន្ទាប់ពីទីក្រុងមូស្គូបើកការវាយលុយលើទីក្រុងកៀវកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក Zelensky ៖ ពិភពលោកកំពុងគិតខុសលើ អ៊ុយក្រែន ថានឹងត្រូវ រុស្ស៊ី កម្ទេចរយៈពេល ៣ ថ្ងៃ