រុស្ស៊ី ប្រើអាវុធពិសេសនៅទីក្រុង Kharkiv របស់ អ៊ុយក្រែន (មានវីដេអូ)

ទីភ្នាក់ងារព័ត៌មានរុស្ស៊ី TASS បានរាយការណ៍ថា កងកម្លាំងរុស្ស៊ី បានប្រើប្រាស់ប្រព័ន្ធអាវុធ ឥន្ធនៈកម្តៅឈ្មោះ TOS-2 “Tosochka” នៅទីក្រុង Kharkiv។ ភ្នាក់ងារសារព័ត៌មាន​គ្រប់គ្រង​ដោយ​រដ្ឋ​មួយនេះ បាន​ដក​ស្រង់​សម្តី​មន្ត្រី​សន្តិសុខ​រុស្ស៊ីម្នាក់ ​ដែលសុំ​មិន​បញ្ចេញ​ឈ្មោះ។

TOS-2 គឺជាអាវុធឥន្ធនៈកម្តៅ ដែលស្រូបយកអុកស៊ីសែនពីខ្យល់ជុំវិញកន្លែងបាញ់ ដើម្បីបង្កើតការផ្ទុះដ៏សម្បើម និងបង្កើនរលកសីតុណ្ហភាពក្តៅខ្ពស់ ខ្លាំងជាងអាវុធធម្មតា ហើយបំផ្លាញសរីរាង្គរបស់មនុស្ស។

កាលពីមុន ប្រទេសរុស្ស៊ីក៏បាននិយាយដែរថា ខ្លួនកំពុងប្រើប្រាស់គ្រាប់រ៉ុកកែត TOS-1 Solntsepyok ប្រឆាំងនឹងគោលដៅនានា នៅក្នុងតំបន់ Donbas ភាគខាងកើត ដែលជាកន្លែងការប្រយុទ្ធគ្នាទ្រង់ទ្រាយធំនៅតែបន្ត។

កាលពីថ្ងៃអាទិត្យទី២៩ខែឧសភា រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា ការរំដោះតំបន់ Donbas របស់អ៊ុយក្រែន គឺជា “អាទិភាពដោយគ្មានលក្ខខណ្ឌ” សម្រាប់រដ្ឋាភិបាលទីក្រុងមូស្គូ។

លោក Lavrov បាននិយាយបែបនេះ នៅក្នុងបទសម្ភាសន៍ជាមួយប៉ុស្តិ៍ទូរទស្សន៍ TF1 របស់បារាំង ខណៈរុស្ស៊ី បន្តការវាយលុករបស់ខ្លួនដើម្បីទទួលបានការគ្រប់គ្រងទីក្រុងសំខាន់ៗនៅ Donbas។

ការលុកលុយ ដែលឥឡូវឈានចូលដល់ខែទី៤ គឺបានសម្លាប់មនុស្សរាប់ពាន់នាក់ក្នុងប្រទេសអ៊ុយក្រែន និងរាប់លាននាក់ផ្លាស់ទីលំនៅ។

យោងតាមអង្គការសហប្រជាជាតិ ជនភៀសខ្លួនជាង ៦.៧លាននាក់បានភៀសខ្លួនចេញពីប្រទេសអ៊ុយក្រែនចាប់តាំងពីថ្ងៃទី ២៤ ខែកុម្ភៈមក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ SKY, Reuters

ចុចអាន៖ លោក Zelensky ទៅដល់ សមរភូមិជួរមុខ នៅភាគខាងកើត ជាលើកដំបូង