លោក Zelensky បង្ហើប តួលេខទាហានអ៊ុយក្រែន ស្លាប់និងរបួសក្នុងមួយថ្ងៃៗ 

ប្រធានាធិបតីអ៊ុយក្រែន លោក Volodymyr Zelensky បាននិយាយថា អ៊ុយក្រែនកំពុងបាត់បង់ទាហានដល់ទៅ ១០០ នាក់ជារៀងរាល់ថ្ងៃ ខណៈប្រទេសនេះ នៅតែបន្តកិច្ចខិតខំប្រឹងប្រែងរបស់ខ្លួន ក្នុងការប្រយុទ្ធជាមួយកងកម្លាំងរុស្ស៊ី។

ក្នុងបទសម្ភាសន៍ជាមួយបណ្តាញសារព័ត៌មានអាមេរិក Newsmax, មេដឹកនាំអ៊ុយក្រែនបាននិយាយថា ស្ថានភាពលំបាកបំផុត គឺនៅភាគខាងកើតប្រទេស ជាពិសេសក្នុងទីក្រុង Severodonetsk និង Lysychansk។

លោកនិយាយថា “ស្ថានភាពនៅភាគខាងកើតគឺពិបាកណាស់។ យើងបាត់បង់ទាហានពី ៦០ ទៅ ១០០ នាក់ជារៀងរាល់ថ្ងៃ ហើយជាធម្មតា មានទាហានរបួសប្រហែល ៥០០នាក់។ ដូច្នេះយើងកំពុងទប់ទល់ក្នុងបរិវេណការពាររបស់យើង”។

ស្របពេលជាមួយគ្នានោះដែរ លោក Zelenskyy បន្ត​ថា គ្រាប់​រ៉ុកកែត​ដែល​អាមេរិក​បញ្ជូន​ទៅ​អ៊ុយក្រែន ​នឹង​មិន​ត្រូវ​ប្រើ​លើ​ដី​រុស្ស៊ី​ទេ។

លោកលើកឡើងថា “ខ្ញុំដឹងថា មនុស្សមួយចំនួននៅសហរដ្ឋអាមេរិកកំពុងនិយាយ ឬមនុស្សនៅក្នុងសេតវិមានកំពុងនិយាយថា យើងប្រហែលជាប្រើរ៉ុកកែតដើម្បីវាយប្រហាររុស្ស៊ី។ មើលចុះ យើងមិនមានគម្រោងវាយប្រហាររុស្ស៊ីទេ។ យើងមិនប្រយុទ្ធនៅលើទឹកដីរបស់រុស្ស៊ីឡើយ”៕

ប្រែសម្រួល៖ Vann Vann

ប្រភព៖ Sky

ចុចអាន៖ គ្រាន់តែអាមេរិកប្រកាសផ្តល់រ៉ុកកែតឲ្យអ៊ុយក្រែនភ្លាម រុស្ស៊ី ធ្វើសមយុទ្ធបាញ់នុយក្លេអ៊ែរភ្លែត