ព័ត៌មានអន្ដរជាតិ
តើនាយករដ្ឋមន្ត្រី គុយបា ធ្វើទស្សនកិច្ចប្រទេសអាស៊ានណាខ្លះ មុនមក កម្ពុជា?
លោក Manuel Marrero Cruz នាយករដ្ឋមន្ត្រីនៃសាធារណរដ្ឋគុយបានឹងមកបំពេញទស្សនកិច្ចផ្លូវការនៅព្រះរាជាណាចក្រកម្ពុជារយៈពេល ៣ ថ្ងៃ ចាប់ពីថ្ងៃទី ៤ ដល់ថ្ងៃទី ៦ ខែតុលា ឆ្នាំ ២០២២ នេះ ខណៈមុនមកកម្ពុជា លោកនាយករដ្ឋមន្ត្រីរូបនេះក៏បានបំពេញទស្សនកិច្ចផ្លូវការនៅប្រទេសអាស៊ាន ២ ផ្សេងទៀតផងដែរដូចជា វៀតណាម និងឡាវ ។
លោក Cruz បានធ្វើដំណើរទស្សនកិច្ចផ្លូវការរយៈពេល ៥ ថ្ងៃទៅកាន់ប្រទេសវៀតណាមកាលពីថ្ងៃសុក្រសប្ដាហ៍មុន ហើយក៏បានជួបពិភាក្សាជាមួយអគ្គលេខាបក្សលោក Nguyen Phu Trong, ប្រធានរដ្ឋលោក Nguyen Xuan Phuc និងប្រធានរដ្ឋសភាលោក Vuong Dinh Hue ពាក់ព័ន្ធនឹងជំហាននៃការពង្រឹងទំនាក់ទំនងទ្វេភាគីឲ្យឡើងដល់កម្ពស់ថ្មី ។
យោងតាមឯកអគ្គរដ្ឋទូតវៀតណាមប្រចាំនៅគុយបាលោក Le Thanh Tung បានឲ្យដឹងថា ដំណើរទស្សនកិច្ចរបស់លោកនាយករដ្ឋមន្ត្រី Cruz មានសារសំខាន់ ព្រោះវាជាលើកទីមួយក្នុងរយៈពេល ៤៩ ឆ្នាំ ដែលនាយករដ្ឋមន្ត្រីគុយបាបានមកបំពេញទស្សនកិច្ចនៅវៀតណាម បន្ទាប់ពីតំណែងនេះត្រូវបានស្ដារឡើងវិញ ក្រោយការអនុម័តរដ្ឋធម្មនុញ្ញគុយបាថ្មីក្នុងឆ្នាំ ២០១៩ ។
វៀតណាម និងគុយបាបានមើលឃើញថា ទំនាក់ទំនងទ្វេភាគីរបស់ពួកគេមានការរីកចម្រើនប្រកបដោយផ្លែផ្កា ចាប់តាំងពីប្រទេសទាំងពីរបានបង្កើតទំនាក់ទំនងការទូតនៅថ្ងៃទី ២ ខែធ្នូ ឆ្នាំ ១៩៦០ បន្ទាប់ពីជោគជ័យនៃបដិវត្តគុយបានៅថ្ងៃទី ១ ខែមករា ឆ្នាំ ១៩៥៩ ។
ដោយឡែកនៅប្រទេសឡាវ, លោក Cruz បានធ្វើដំណើរមកដល់អាកាសយានដ្ឋានអន្តរជាតិ Wattay នៅទីក្រុងវៀងចន្ទន៍កាលពីថ្ងៃអាទិត្យក្នុងដំណើរទស្សនកិច្ចរយៈពេល ៣ ថ្ងៃចាប់ពីថ្ងៃទី ២ ដល់ថ្ងៃទី ៤ ខែតុលា ក្នុងគោលបំណងពង្រឹងចំណងមិត្តភាព និងទំនាក់ទំនងដ៏យូរអង្វែងរវាងឡាវ និងគុយបា ហើយទទួលបានស្វាគមន៍ជាពិសេសដោយលោកនាយករដ្ឋមន្ត្រី Phankham Viphavanh ផងដែរ ។
ភាគីទាំងពីរបានពិភាក្សា និងផ្លាស់ប្តូរយោបល់លើបញ្ហាផ្សេងៗ រួមទាំងការកសាងប្រទេសឡើងវិញ បន្ទាប់ពីជំងឺកូវីដ ១៩ ក៏ដូចជាកិច្ចសហប្រតិបត្តិការលើវិស័យសុខាភិបាល អប់រំ និងកីឡា ហើយក្នុងនោះក៏រួមមានទាំងអាហារូបករណ៍សម្រាប់ការអភិវឌ្ឍធនធានមនុស្ស ការបញ្ជូនអ្នកជំនាញពេទ្យគុយបាមកប្រទេសឡាវ និងគ្រូបង្វឹកប្រដាល់បរទេសដើម្បីបណ្តុះបណ្តាលអត្តពលិកឡាវផងដែរ ។
គួរបញ្ជាក់ថា ប្រទេសគុយបា និងឡាវបានបង្កើតទំនាក់ទំនងការទូតលើកដំបូងនៅថ្ងៃទី ៤ ខែវិច្ឆិកា ឆ្នាំ១៩៧៤ ហើយលោកប្រធានាធិបតី Miguel Diaz-Canel ក៏ធ្លាប់បានធ្វើទស្សនកិច្ចជាផ្លូវការនៅប្រទេសឡាវផងដែរក្នុងឆ្នាំ ២០១៨ ៕
ប្រែសម្រួលដោយ ៖ ជីវ័ន្ត
ប្រភព ៖ Tuoi Tre / Laotian Times
ចុចអាន ៖ នាយករដ្ឋមន្ត្រី គុយបា នឹងធ្វើទស្សនកិច្ចផ្លូវការនៅកម្ពុជានៅថ្ងៃទី ៤ ខែតុលានេះ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង