អតីតមេដឹកនាំ​គុយបា បង្ហាញខ្លួនជាសាធារណៈ មិនខ្វល់ដីកាចាប់ខ្លួន​របស់​​អាមេរិក

អតីតមេដឹកនាំដ៏មានឥទ្ធិពលរបស់ប្រទេសគុយបា លោក Raul Castro បានបង្ហាញខ្លួនជាសាធារណៈលើកដំបូង បន្ទាប់ពីលោកត្រូវបានតុលាការសហរដ្ឋអាមេរិក ចោទប្រកាន់ពីបទឃាតកម្មកាលពីខែមុន។ នេះ​បើយោង​តាម​ទីភ្នាក់ងារ​ព័ត៌មាន Reuters ចុះផ្សាយ​នៅ​ថ្ងៃ​សៅរ៍ ទី​៦ ខែ​មិថុនា ឆ្នាំ​​២០២៦។

ទូរទស្សន៍រដ្ឋគុយបា កាលពីថ្ងៃសុក្រ បានផ្សាយ​ថា លោក Castro បានចូលរួម ក្នុងពិធីអបអរសាទរមួយរបស់ក្រសួងមហាផ្ទៃ នៅក្នុងទីក្រុងឡាហាវ៉ាន យ៉ាងរំភើយ ដោយមិនខ្វល់ខ្វាយពីសម្ពាធផ្លូវច្បាប់របស់អាមេរិកឡើយ។

ការបង្ហាញខ្លួននេះ បានធ្វើឡើង បន្ទាប់ពីរដ្ឋបាលរបស់លោកប្រធានាធិបតី ដូណាល់ ត្រាំ បានទម្លាក់កំហុស និងចោទប្រកាន់អតីតរដ្ឋមន្ត្រីក្រសួងការពារជាតិគុយបារូបនេះថា ជាអ្នកបញ្ជាឲ្យយន្តហោះចម្បាំងគុយបាបាញ់ទម្លាក់យន្តហោះស៊ីវិល ដែលបើកដោយក្រុមជនភៀសខ្លួនគុយបា កាលពីឆ្នាំ១៩៩៦។ ការចោទប្រកាន់នេះ ត្រូវបានគេមើលឃើញថា ជាការបង្កើនសម្ពាធយ៉ាងខ្លាំងក្លាមួយកម្រិតទៀតពីសំណាក់ទីក្រុងវ៉ាស៊ីនតោន ទៅលើរដ្ឋាភិបាលកុម្មុយនិស្តនៃដែនកោះគុយបា។

មេដឹកនាំជើងចាស់រូបនេះ ទើបតែបានប្រារព្ធពិធីខួបកំណើតឈានចូលវ័យ ៩៥ឆ្នាំ កាលពីថ្ងៃពុធកន្លងទៅ។ មុនពេលមានការប្រកាសចោទប្រកាន់ពីបទឃាតកម្មនោះ គេបានឃើញលោកបង្ហាញខ្លួនជាសាធារណៈចុងក្រោយបង្អស់ គឺនៅក្នុងព្រឹត្តិការណ៍អបអរសាទរទិវាពលកម្មអន្តរជាតិ១ឧសភា នៅក្នុងទីក្រុងឡាហាវ៉ាន កាលពីមួយខែមុន។

គួររំឮកផងដែរថា មុនពេលចូលរួមទិវាពលកម្មនោះ លោក Castro បានបាត់មុខពីសាធារណជនមួយរយៈធំ តាំងពីថ្ងៃទី១៥ ខែមករាមកម្ល៉េះ។ កាលណោះ លោកបានចូលរួមក្នុងពិធីជាផ្លូវការមួយនៅក្នុងរដ្ឋធានី ដើម្បីគោរពវិញ្ញាណក្ខន្ធទាហានគុយបាចំនួន ៣២នាក់ ដែលបានពលីជីវិត នៅក្នុងប្រតិបត្តិការចាប់ខ្លួនប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro)៕

ប្រែសម្រួល៖ ឈាង