អ៊ុយក្រែន កែនទាហានស៊ីឈ្នួលបរទេសរាប់ពាន់នាក់ទៀតទៅតំបន់​ភាគខាង​ត្បូង

លោក Vladimir Rogov សមាជិកក្រុមប្រឹក្សានៃរដ្ឋបាលតំបន់ Zaporozhye បានប្រាប់សារព័ត៌មាន Sputnik ថា អាជ្ញាធរទីក្រុងកៀវបានកែនទាហានស៊ីឈ្នួលប៉ូឡូញជាង ៥,០០០ នាក់នៅក្នុងតំបន់ Zaporozhye ភាគខាងត្បូងអ៊ុយក្រែន ។

លោក Rogov បាននិយាយថា “រដ្ឋាភិបាលទីក្រុងកៀវ បានកែនទាហានស៊ីឈ្នួលមួយចំនួនធំនៅខ្សែត្រៀមជួរមុខនៃតំបន់ Zaporozhye ហើយតាមការប៉ាន់ស្មានរបស់យើង គ្រាន់តែទាហានស៊ីឈ្នួលប៉ូឡូញតែឯង មានរហូតទៅដល់ជាង ៥,០០០ នាក់ឯណោះ” ។

មន្ត្រីរូបនេះបានបន្ថែមទៀតថា ក្រៅពីទាហានស៊ីឈ្នួលប៉ូឡូញ ក៏មានទាហានស៊ីឈ្នួលជាច្រើននាក់ទៀត មកពីប្រទេសហ្សកហ្ស៊ី និងក្រុមភេរវករអន្តរជាតិផ្សេងៗផងដែរ ។

ដោយឡែកអ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយកាលពីដើមខែនេះថា  ទាហានស៊ីឈ្នួលជាង ៨,០០០ នាក់មកពីជាង ៦០ ប្រទេសបានជាប់ពាក់ព័ន្ធក្នុងអរិភាពលើភាគីអ៊ុយក្រែន ។

គួររំឭកថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោកប្រធានាធិបតីរុស្ស៊ី វ្ល៉ាឌីមៀរ ពូទីន ចាត់ទុកជា “ប្រតិបត្តិការយោធាពិសេស” បានអូសបន្លាយពេលជិត ៩ ខែហើយ បន្ទាប់ពីផ្ទុះការវាយលុកលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ុយក្រែន ថា ការដកទ័ព រុស្ស៊ី ចេញពីតំបន់ Kherson មិនមែនជារឿងល្អទេ