ប្រភពព័ត៌មានបានឱ្យដឹងថា ឡាវបានបើកបណ្តាញខ្សែកាបបញ្ជូនអគ្គិសនីកម្លាំង ៥០០kV មកកម្ពុជាជាផ្លូវការ ដើម្បីសម្រេចបានគោលដៅលក់អគ្គិសនីឱ្យប្រទេសជិតខាង (កម្ពុជា) ដែលមានកម្លាំង ៦០០០មេហ្គាវ៉ាត់ (MW) រហូតដល់ឆ្នាំ២០៣០។

នៅថ្ងៃទី៣ ខែមករា ឆ្នាំ២០២៣ នៅស្ថានីយ៍ថាមពលអគ្គិសនី ខេត្តចាំប៉ាសាក់ភាគខាងត្បូងនៃប្រទេសឡាវ បានរៀបចំពិធីសម្ពោធខ្សែកាបបញ្ជូនអគ្គិសនី ៥០០kV ពីស្ថានីយ៍ថាមពលមួយនេះទៅកាន់ព្រំដែនប្រទេសកម្ពុជាជាផ្លូវការ ក្រោមអធិបតីភាពរបស់លោក ថងផាត់ អីនថាវង់ អនុរដ្ឋមន្ត្រីក្រសួងរ៉ែ និងថាមពលឡាវ។

បណ្តាញខ្សែកាបបញ្ជូនអគ្គិសនីនេះមានប្រវែងសរុបចំនួន ២០០គីឡូម៉ែត្រ ដោយមានចំណុចចាប់ផ្តើមពីស្រុកខូងដែលឆ្លងកាត់ស្រុកចំនួន៣ របស់ខេត្តចំប៉ាសាក់ចូលឆ្ពោះទៅកាន់ព្រំដែនប្រទេសកម្ពុជា និងតភ្ជាប់បណ្តាញថាមពលរបស់កម្ពុជា។

សម្បទានសម្រាប់ការសាងសង់ និងគ្រប់គ្រងបណ្តាញខ្សែកាបបញ្ជូនថាមពលអគ្គិសនីនេះ គឺស្ថិតលើក្រុមហ៊ុន Yunnan Energy Investment (HK) ដែលជាអ្នកទទួលបានសិទ្ធិសម្បទានពីរដ្ឋាភិបាលឡាវ ក្នុងទឹកប្រាក់វិនិយោគសរុបសម្រាប់ការសាងសង់ចំនួន ១៥០លានដុល្លារអាមេរិក។

កន្លងមកនៅថ្ងៃទី២០ ខែមិថុនា ឆ្នាំ២០២២ លោក ដាវវង់ ផនកែវ រដ្ឋមន្ត្រីក្រសួងរ៉ែនិងថាមពលឡាវបានថ្លែងរាយការណ៍ក្នុងអង្គប្រជុំរដ្ឋសភាឡាវទាក់ទងនឹងការលក់អគ្គិសនីឱ្យកម្ពុជាថា កម្ពុជាបានព្រមព្រៀងទិញអគ្គិសនីពីប្រទេសឡាវក្នុងទំហំសរុប ៦០០០MW រហូតដល់ឆ្នាំ២០៣០ ហើយគិតត្រឹមថ្ងៃរាយការណ៍ (២០ មិថុនា ២០២២) ប្រទេសឡាវបានបញ្ជូនអគ្គិសនីលក់ឱ្យកម្ពុជាបានចំនួន ៤៤៥មេហ្គាវ៉ាត់៕

ប្រែសម្រួល៖ គង់ សំអាន

ប្រភព៖ Mgronline