​លោក ស សុខា នឹងបំពេញទស្សនកិច្ចនៅឡាវ ដើម្បីប្រជុំវាយតម្លៃការងារឆ្នាំចាស់ និងដាក់ចេញផែនការឆ្នាំថ្មី

ដោយបានការអនុញ្ញាតដ៏ខ្ពង់ខ្ពស់ពី សម្តេចនាយករដ្ឋមន្ត្រី, លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងដឹកនាំគណៈប្រតិភូជាន់ខ្ពស់កម្ពុជា ចាកចេញពីប្រទេសកម្ពុជា​នៅល្ងាចនេះ ដើម្បីបំពេញទស្សនកិច្ចការងារ នៅរដ្ឋធានីវៀងប្រទេសឡាវ ចាប់ពីថ្ងៃទី២៤ ដល់ ២៦ ខែមីនា ឆ្នាំ២០២៥ ។

សេចក្ដីប្រកាសព័ត៌មានរបស់ក្រសួងមហាផ្ទៃ ឱ្យដឹងថា ដំណើរទស្សនកិច្ចនេះ ធ្វើឡើងតបតាមការអញ្ជើញរបស់ លោក នាយឧត្តមសេនីយ៍ វិល័យ ឡាខាំហ្វង ឧបនាយករដ្ឋមន្ត្រី រដ្ឋមន្ត្រីក្រសួងសន្តិសុខសាធារណៈឡាវ។  

តាមសេចក្ដីប្រកាសព័ត៌មាន ដំណើរទស្សនកិច្ចនេះ គឺជាការបន្តអនុវត្តយន្តការសហប្រតិបត្តិការទ្វេភាគីប្តូរវេនប្រចាំឆ្នាំ រវាង ក្រសួងមហាផ្ទៃ នៃព្រះរាជាណាចក្រកម្ពុជា ជាមួយក្រសួងសន្តិសុខសាធារណៈឡាវ។ លោកអភិសន្តិបណ្ឌិត ស សុខា នឹងអញ្ជើញធ្វើជាសហប្រធានដឹកនាំ កិច្ចប្រជុំពិនិត្យវាយតម្លៃលទ្ធផលកិច្ចសហប្រតិបត្តិការឆ្នាំ២០២៤ និងចុះហត្ថលេខាលើកំណត់ហេតុស្តីពី កិច្ចសហប្រតិបត្តិការឆ្នាំ២០២៥ សម្រាប់អនុវត្តបន្តក្នុងក្របខណ្ឌ នៃកិច្ចសហប្រតិបត្តិការទ្វេភាគី ។

គួរឱ្យដឹងថា កាលពីថ្ងៃទី ១៨ដល់ថ្ងៃទី១៩ ខែកុម្ភៈ  កន្លងទៅ លោក ស សុខា  ធ្លាប់បំពេញទស្សនកិច្ចការងារនៅប្រទេសវៀតណាម ដើម្បីចូលរួមកិច្ចប្រជុំពិនិត្យ វាយតម្លៃលទ្ធផលកិច្ចសហប្រតិបត្តិការឆ្នាំ២០២៤ និងចុះហត្ថលេខាលើផែនការសហប្រតិបត្តិការឆ្នាំ២០២៥។

ជារួម បន្ទាប់ពីចូលកាន់តំណែងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកម្ពុជា កាលពីថ្ងៃទី២២ ខែសីហា ឆ្នាំ២០២៣ លោក  ស សុខា ធ្លាប់បានបំពេញទស្សនកិច្ចការងារនៅប្រទេសចំនួន៥ ស្មើនឹង៦លើក ទាំងក្នុង និងក្រៅតំបន់អាស៊ាន។ ក្នុងនោះ លោក ស សុខា ចេញទៅបំពេញទស្សនកិច្ចការងារនៅប្រទេសវៀតណាមចំនួន២លើក,  ស្វីស១លើក, អាល្លឺម៉ង់១លើក, អូស្ត្រាលី១លើក និងចិន១លើក។ សម្រាប់ដំណើរទៅកាន់ប្រទេសឡាវ នាពេលនេះ​អាចរាប់បានថា​ គឺជាដំណើរទស្សនកិច្ចលើកទី៧ បន្ទាប់ពីចូលកាន់តំណែងជាឧបន​ាយករដ្ឋមន្ត្រី រដ្ឋម​​ន្ត្រីក្រសួងមហាផ្ទៃ៕

ដោយ៖ ង៉ិល ណារ៉ាត់