នាយករដ្ឋមន្ត្រីកាណាដា បញ្ជាយន្តហោះអាមេរិកបាញ់ទម្លាក់វត្ថុអាថ៌កំបាំង នៅលើទឹកដីខ្លួន

យន្តហោះ​ចម្បាំង​អាមេរិក​មួយ​គ្រឿង​បាន​ធ្វើ​តាម​ការ​បញ្ជា​របស់​នាយក​រដ្ឋមន្ត្រី​កាណាដា Justin Trudeau បាញ់​ទម្លាក់​វត្ថុ​មិន​ស្គាល់​អត្តសញ្ញាណ​មួយ​នៅ​លើអាកាស​ប្រទេស​កាណាដា​ កាល​ពី​ថ្ងៃ​សៅរ៍ ទី១១ ខែកុម្ភៈ ដែលនេះ​ជា​ការ​បាញ់ទម្លាក់​លើក​ទី​ពីរ​នៅ​ចំព្រំដែនរវាង​​អាមេរិក​ខាង​ជើងនិងកាណាដា ​ចាប់​តាំង​ពី​ការ​បាញ់​ទម្លាក់​គ្រាប់​បាល់​ស៊ើបការណ៍​ចិន​ដែល​គេ​សង្ស័យ​មួយ​សប្តាហ៍កន្លងទៅ។

ដោយសារកាលពីចុងខែមុន កាណាដាធ្លាប់បាញ់ទម្លាក់ប៉េងប៉ោងចារកម្មចិនដែលឆ្លងកាត់ប្រទេសរបស់ខ្លួន និងដីគោករបស់សហរដ្ឋអាមេរិក ទើបពេលនេះកាណាដាដាក់ការសង្ស័យចំពោះវត្ថុអាថ៌កំបាំងដែលមិនទាន់ស្គាល់អត្តសញ្ញាណថា វាអាចចារកម្មដូចពីមុន។

លោក Justin Trudeau នាយករដ្ឋមន្ត្រីកាណាដា បានសរសេរនៅលើ Twitter កាលពីថ្ងៃសៅរ៍ថា “យន្តហោះរបស់កាណាដា និងសហរដ្ឋអាមេរិកត្រូវបានប៉ះទង្គិច ហើយយន្តហោះ F-22 របស់អាមេរិកបានបាញ់វត្ថុអាថ៌កំបាំងដោយជោគជ័យ” ខណៈបច្ចុប្បន្នកងកម្លាំងកំពុងប្រមូលបំបែកវត្ថុដែលនៅសល់ ព្រមទាំងយកវាទៅវិភាគ។

ពេលនេះប្រតិបត្តិការស្វែងរក និងស្រង់យកវត្ថុដែលនៅសេសសល់នៅតែបន្ត មិនទាន់រួចរាល់នោះទេ ដោយសារកាលពីថ្ងៃសៅរ៍ តំបន់កើតហេតុមានខ្យល់ត្រជាក់ និងមានព្រិលធ្លាក់ខ្លាំងពេក៕

ប្រែសម្រួល៖ សន្យា

ប្រភព៖ CNA

ចុចអាន៖ រុស្ស៊ី កាត់បន្ថយផលិតប្រេង ៥០ ម៉ឺនបារ៉ែលក្នុងមួយថ្ងៃ ខណៈទាហានកំពុង​បន្តប្រយុទ្ធនៅ អ៊ុយក្រែន