គុយវ៉ែត បញ្ជាក់ថា មានយន្តហោះចម្បាំងអាមេរិក ៤-៥គ្រឿង បានធ្លាក់

តាមការបញ្ជាក់ពីប្រទេសគុយវ៉ែត មានយន្តហោះចម្បាំងអាមេរិក៤-៥គ្រឿងបានធ្លាក់ នៅព្រឹកថ្ងៃចន្ទទី២ខែមីនា ស្របពេលសង្គ្រាមនៅមជ្ឈិមបូព៌ា កាន់តែរីកធំឡើង។

សារព័ត៌មាន Xinhua របស់ចិន បានដកស្រង់សេចក្តីប្រកាសរបស់ក្រសួងការពារជាតិគុយវ៉ែត ដែលបង្ហោះលើបណ្តាញសង្គម X ថា៖ យន្តហោះចម្បាំងអាមេរិក ៤-៥គ្រឿងធ្លាក់នៅព្រឹកនេះ។ អាកាសយានិកទាំងអស់បានរួចផុតពីគ្រោះថ្នាក់ដោយគ្មានរបួសស្នាមអ្វីឡើយ ហើយត្រូវជម្លៀសនិងបញ្ជូនទៅកាន់មន្ទីរពេទ្យ។

យ៉ាងណាក៏ដោយ ក្រសួងមិនបញ្ជាក់ច្បាស់ពីទីតាំងដែលយន្តហោះធ្លាក់ ឬថាតើយន្តហោះចម្បាំងរបស់អាមេរិក ធ្លាក់អស់ប៉ុន្មានគ្រឿង ឬធ្លាក់ដោយសារអ្វីនោះទេ។

ទោះបែបនេះ ក្រសួងលើកឡើងថា ខ្លួនកំពុងសម្របសម្រួលជាមួយសម្ព័ន្ធមិត្តអាមេរិក ពាក់ព័ន្ធនឹងឧបទ្ទវហេតុនេះ ហើយក៏កំពុងបន្តការស៊ើបអង្កេតលើ មូលហេតុពិតផងដែរ៕

អត្ថបទ៖ សុខ សុវណ្ណ