តម្រួតថៃបង្ក្រាបបានថ្នាំញៀន ១០ លានគ្រាប់លាក់ក្នុងទំនិញ

ប្រទេសថៃ ៖ ថ្នាំញៀនប្រភេទយ៉ាម៉ា ចំនួន ១០ លានគ្រាប់ ត្រូវបានកម្លាំងជំនាញដាក់គោលដៅត្រួតពិនិត្យ និងធ្វើការបង្ក្រាប ក្រោយពីទទួលបានសេចក្តីរាយការណ៍ យ៉ាងច្បាស់ពីបណ្តាញ ក ស រួចមក។

កិច្ចប្រតិបត្តិការនេះបានធ្វើឡើងកាលពីល្ងាចថ្ងៃទី២៤ ខែកុម្ភ: ឆ្នាំ២០២៣ នៅក្នុងភូមិសាស្ត្រស្រុកមឿង ខេត្តសិង្ហបុរី ប្រទេសថៃ ដោយដឹកជញ្ជូនថ្នាំញៀន ចេញពីភាគខាងជើងនៃប្រទេសថៃ ទៅកាន់ភាគកណ្តាល​ដើម្បីចែកចាយ​ឱ្យឈ្មួញ។

នៅមុនពេលបង្ក្រាបគឺមានរថយន្តនីសាន់ផ្ទុកទំនិញចំនួន៤គ្រឿង បានបើកបរបម្រុងឆ្លងកាត់គោលដៅ ដែលរថយន្ត​ទាំងនេះ គឺជាមុខសញ្ញាដែលកម្លាំង ក ស រាយការណ៍មក ទើបសមត្ថកិច្ចឃាត់តែម្តងដើម្បីសុំត្រួតពិនិត្យ នៅទីបំផុត​ក៏បានប្រទះឃើញថ្នាំញៀនប្រភេទយ៉ាម៉ាចំនួន ១០ លានគ្រាប់ ដែលពួកគេដាក់បង្កប់នៅពីក្រោមទំនិញ ទើបសមត្ថកិច្ច​ឃាត់​ខ្លួនអ្នកបើកបរទាំង៤នាក់នោះ។

នៅចំពោះមុខសមត្ថកិច្ច ជនសង្ស័យទាំង៤នាក់ ដែលពីមុនជាកសិករនៅក្នុងស្រុកម៉ែសត ខេត្តតាក បានសារភាពថា ដោយសារតែការធ្វើស្រែចម្ការមិនបានផល ទើបពួកគេសម្រេចចិត្តងាកមកស៊ីឈ្នួលដឹកគ្រឿងញៀនឱ្យគេវិញ ដោយម្នាក់ៗទទួលបានប្រាក់ឈ្នួល ១០ ម៉ឺនបាត ។ បច្ចុប្បន្នជនសង្ស័យរួមនិងវត្ថុតាង ត្រូវបានកម្លាំងជំនាញ​រៀបចំឯកសារដើម្បីបញ្ជូនខ្លួនទៅតាមផ្លូវច្បាប់ ៕ អត្ថបទ : សោ និយមរ័ត្ន