មនុស្សចំនួន១២នាក់បានស្លាប់ បន្ទាប់ពីការរញ្ជួយដីដ៏ខ្លាំងក្លាមួយ វាយប្រហារឆ្នេរសមុទ្រភាគខាងត្បូងនៃប្រទេសអេក្វាទ័រ កាលពីថ្ងៃសៅរ៍ទី១៨ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគារជាច្រើនក៏ត្រូវខូចខាតផងដែរ នៅក្នុងទីក្រុងនានា បន្ទាប់ពីគ្រោះរញ្ជួយដីកម្រិត ៦.៧រ៉ិចទ័រ។

ខេត្ត El Oro ភាគខាងត្បូង គឺជាកន្លែងដែលរងផលប៉ះពាល់ខ្លាំងបំផុត ដោយនៅទីនោះ សេវាសង្គ្រោះបន្ទាន់បានរាយការណ៍ថា មនុស្សនៅតែជាប់គាំងក្នុងផ្ទះដែលដួលរលំ។

អាជ្ញាធរ​​និយាយ​ថា មនុស្សចំនួន​១១​នាក់​ស្លាប់​​នៅ​ក្នុង​ខេត្ត El Oro និង​ម្នាក់​នៅ​ខេត្ត Azuay។

ចំណុចកណ្តាលនៃការរញ្ជួយដីនេះ គឺស្ថិតនៅជិតទីក្រុង Balao ចម្ងាយប្រហែល ៨០គីឡូម៉ែត្រ ពីទីក្រុងធំទីពីររបស់អេក្វាទ័រគឺ Guayaquil ដែលមានប្រជាជនរស់នៅប្រហែល ៣លាននាក់។

ស្របពេលជាមួយគ្នានោះ លោកប្រធានាធិបតី Guillermo Lasso បានស្នើឲ្យប្រជាជនអេក្វាទ័ររក្សាភាពស្ងប់ស្ងាត់ ខណៈក្រុមមន្ត្រីកំពុងវាយតម្លៃការខូចខាត។

គួរបញ្ជាក់ថា នេះគឺជាការរញ្ជួយដីខ្លាំងបំផុត ដែលបានវាយប្រហារប្រទេសអេក្វាទ័រចាប់តាំងពីឆ្នាំ២០១៦ ដែលមនុស្សជិត៧០០នាក់បានស្លាប់ និងរាប់ពាន់នាក់រងរបួស៕

ប្រែសម្រួល៖ Vann Vann

ប្រភព៖ BBC

ចុចអាន៖ តំបន់រងគ្រោះដោយរញ្ជួយដីនៅស៊ីរី ពេលនេះផ្ទុះជំងឺអាសន្នរោគ បណ្តាលឲ្យមនុស្សស្លាប់ទៀត