ក្រុមសង្គ្រោះបន្ទាន់នៅក្នុងតំបន់កាន់កាប់ដោយក្រុមប្រឆាំងបាននិយាយថា មនុស្សពីរនាក់បាត់បង់ជីវិតដោយសារជំងឺអាសន្នរោគនៅភាគពាយ័ព្យប្រទេសស៊ីរី បន្ទាប់ពីគ្រោះរញ្ជួយដីដ៏ខ្លាំងក្លាបានវាយប្រហារតំបន់នេះ។

បើគិតពីចំនួនអ្នកស្លាប់សរុបដោយសារជំងឺអាសន្នរោគនៅភាគពាយ័ព្យ ចាប់តាំងពីការផ្ទុះឡើងកាលពីឆ្នាំមុនមក ឥឡូវនេះគឺបានកើនឡើងដល់២២នាក់ហើយ ខណៈករណីមិនស្លាប់ចំនួន៥៦៨នាក់ផ្សេងទៀត ត្រូវបានរាយការណ៍។ នេះបើតាមការបញ្ជាក់ពីក្រុមការពារស៊ីវិលស៊ីរី ដែលត្រូវបានគេស្គាល់ថាជា ក្រុមមួកស។

ក្រុមនេះបានបង្ហោះ Twitter ថា “ការបំផ្លិចបំផ្លាញហេដ្ឋារចនាសម្ព័ន្ធ បណ្តាញទឹក និងលូបន្ទាប់ពីគ្រោះរញ្ជួយដី បានបង្កើនលទ្ធភាពនៃការផ្ទុះឡើងជំងឺអាសន្នរោគ”។

ការរញ្ជួយដី ក៏បានធ្វើឲ្យស្ថានភាពកាន់តែអាក្រក់ទៅៗផងដែរ​ នៅក្នុងជំរំជនភៀសខ្លួនក្នុងតំបន់ ដែលខ្វះអនាម័យ និងលទ្ធភាពទទួលបានទឹកស្អាតរួចទៅហើយ។

គួរបញ្ជាក់ថា ការផ្ទុះឡើងនៃជំងឺអាសន្នរោគ ត្រូវបានផ្សារភ្ជាប់ជាលើកដំបូងនៅក្នុងខែកញ្ញាទៅនឹងទឹកកខ្វក់នៅជិតទន្លេ Euphrates។ ចាប់តាំងពីពេលនោះមក វាបានរីករាលដាលពាសពេញផ្នែកផ្សេងៗនៃប្រទេសដែលបាក់បែកដោយសង្រ្គាមជាងមួយទសវត្សរ៍៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ម៉ាឡេស៊ី រៃអង្គាសបានប្រាក់ជាង ១១ លានដុល្លារ យកទៅជួយអ្នកនៅរស់ពីគ្រោះរញ្ជួយដី តួកគី-ស៊ីរី