អ្នកជំនាញព្រមានថា ឆ្នាំនេះ ពិភពលោកនឹងជួបប្រទះអាកាសធាតុក្តៅបំផុត ក្នុងប្រវត្តិសាស្រ្ត

អ្នកវិទ្យាសាស្ត្រអាកាសធាតុបានព្រមានថា ពិភពលោកអាចបំបែកកំណត់ត្រាសីតុណ្ហភាព នៅឆ្នាំ២០២៣ឬ២០២៤ ដែលបណ្តាលមកពីបម្រែបម្រួលអាកាសធាតុ និងការវិលត្រលនៃបាតុភូត El Nino។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Carlo Buontempo នាយកមជ្ឈមណ្ឌលសេវាបម្រែបម្រួលអាកាសធាតុ Copernicus របស់សហភាពអឺរ៉ុបបាននិយាយថា “ជាធម្មតា El Nino ត្រូវបានផ្សារភ្ជាប់ជាមួយនឹងសីតុណ្ហភាពបំបែកឯតទគ្គកម្មនៅកម្រិតពិភពលោក។ មិនថាវានឹងកើតឡើងនៅឆ្នាំ២០២៣ឬ២០២៤នោះទេ ប៉ុន្តែខ្ញុំគិតថា វាច្បាស់ជាកើតឡើង”។

គួរបញ្ជាក់ថា ឆ្នាំដែលក្តៅបំផុតក្នុងកំណត់ត្រាពិភពលោកគិតមកត្រឹមពេលនេះគឺឆ្នាំ២០១៦ ដោយសារតែបាតុភូត El Nino ដ៏ខ្លាំងក្លា។ ហើយប្រាំបីឆ្នាំចុងក្រោយនេះ គឺជារយៈពេលប្រាំបីឆ្នាំដែលក្តៅបំផុតក្នុងកំណត់ត្រាពិភពលោក ខណៈការឡើងកម្តៅរយៈពេលវែងនេះ គឺជំរុញដោយការបំភាយឧស្ម័នផ្ទះកញ្ចក់។

ដោយឡែក លោក Friederike Otto សាស្ត្រាចារ្យជាន់ខ្ពស់នៅវិទ្យាស្ថាន Grantham នៃសាកលវិទ្យាល័យ Imperial College London បាននិយាយថា សីតុណ្ហភាពដែលជំរុញដោយ El Nino អាចធ្វើឲ្យផលប៉ះពាល់នៃការប្រែប្រួលអាកាសធាតុកាន់តែអាក្រក់ទៅៗ ស្របពេលប្រទេសនានាកំពុងជួបប្រទះរួចទៅហើយ ដូចជារលកកម្តៅធ្ងន់ធ្ងរ គ្រោះរាំងស្ងួត និងភ្លើងឆេះព្រៃជាដើម។

គួរបញ្ជាក់ថា ទ្វីបអឺរ៉ុបបានជួបប្រទះរដូវក្តៅ ក្តៅបំផុតរបស់ខ្លួនក្នុងកំណត់ត្រាកាលពីឆ្នាំ២០២២ ខណៈភ្លៀងធ្លាក់ខ្លាំងដែលបង្កឡើងដោយបម្រែបម្រួលអាកាសធាតុ បានបង្កជាគ្រោះទឹកជំនន់ដ៏មហន្តរាយនៅប្រទេសប៉ាគីស្ថាន ហើយក្នុងខែកុម្ភៈ កម្រិតទឹកកកសមុទ្រអង់តាក់ទិកបានឈានដល់កម្រិតទាបបំផុត៕

ប្រែសម្រួល៖ Vann Vann

ប្រភព៖ Reuters

ចុចអាន៖ មកដឹងមូលហេតុខ្លះៗដែល ពិភពលោក កំពុងជួបរលកកម្ដៅខ្លាំងបែបនេះ