ភាគីជម្លោះនៅស៊ូដង់ យល់ព្រមបទឈប់បាញ់ថ្មីរយៈពេល ៧២ ម៉ោង

រដ្ឋមន្ត្រីការបរទេសអាមេរិក លោក Antony Blinken និយាយថា ភាគីជម្លោះនៅស៊ូដង់បានយល់ព្រមបទឈប់បាញ់រយៈពេល ៧២ ម៉ោង គិតចាប់ពីពាក់កណ្តាលអធ្រាត្រថ្ងៃចន្ទទី២៤ខែមេសាទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាបទឈប់បាញ់លើកទីបីហើយដែលត្រូវបានប្រកាស ចាប់តាំងពីអំពើហិង្សា ផ្ទុះឡើងក្នុងខែនេះ ប៉ុន្តែគ្មានបទឈប់បាញ់ណាមួយត្រូវគេគោរពនោះទេ។

លោក Blinken និយាយថា កងទ័ពនិងកងកម្លាំងគាំទ្ររហ័ស (RSF) បានឈានដល់កិច្ចព្រមព្រៀង បន្ទាប់ពីការចរចារយៈពេល៤៨ម៉ោង។

ទន្ទឹមនោះ RSF បានគាំទ្រការប្រកាសរបស់លោក Blinken ដោយនិយាយថា ពួកគេប្តេជ្ញាចិត្តចំពោះបទឈប់បាញ់ពេញលេញនេះ។ ទោះបីជាយ៉ាងណាក៏ដោយ កងទ័ព​មិន​បាន​ធ្វើ​អត្ថាធិប្បាយ​ភ្លាមៗ​ចំពោះ​ព័ត៌មាន​នេះ​ទេ។

គួរបញ្ជាក់ថា គិតត្រឹមពេលនេះ មនុស្សជាង៤០០នាក់ហើយ ត្រូវបានសម្លាប់ចាប់តាំងពីការប្រយុទ្ធគ្នាបានផ្ទុះឡើងកាលពីថ្ងៃទី១៥ខែមេសា។

ស្របពេលជាមួយគ្នានោះដែរ អគ្គលេខាធិការអង្គការសហប្រជាជាតិ លោក Antonio Guterres បានព្រមានថា អំពើហិង្សាក្នុងប្រទេសស៊ូដង់ កំពុងប្រឈមនឹងការក្លាយទៅជា “ការបំផ្លិចបំផ្លាញដ៏មហន្តរាយ” ដែលអាចលេបត្របាក់តំបន់ទាំងមូល និងលើសពីនេះទៅទៀត៕

ប្រែសម្រួល៖ Vann Vann

ប្រភព៖ BBC

ចុចអាន៖ ជនស៊ីវិលស្លាប់និងរបួស កើនដល់ជាង ៤០០០នាក់ ក្នុងការប្រយុទ្ធគ្នានៅ ស៊ូដង់