សីតុណ្ហភាពឡើងខ្លាំង! គ្រូបង្រៀនហ្វីលីពីន នាំកូនសិស្សចេញក្រៅថ្នាក់ រកម្លប់ដើម្បីអង្គុយរៀន 

គ្រូបង្រៀននៅប្រទេសហ្វីលីពីន បានសម្រេចចិត្តនាំកូនសិស្សចេញទៅរៀនក្រៅថ្នាក់ នៅកន្លែងមានម្លប់ ខណៈសីតុណ្ហភាពឡើងខ្លាំង។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Joel Casungcad ដែលបង្រៀននៅវិទ្យាល័យ Lutucan Integration National High School ក្នុងតំបន់ Sariaya ចម្ងាយ១២០គីឡូម៉ែត្រភាគខាងត្បូងរដ្ឋធានីម៉ានីល បានបង្ហោះរូបភាពលើ Facebook បង្ហាញពីកូនសិស្សរបស់គាត់ កំពុងប្រឡងនៅទីវាល។

លោក Casungcad បានប្រាប់ស្ថានីយវិទ្យុ Bombo Radyo ថា “អាកាសធាតុក្តៅណាស់នៅថ្ងៃព្រហស្បតិ៍។ ខ្ញុំបារម្ភថា ពួកគេប្រហែលជាមិនអាចផ្តោតទៅលើការប្រឡងរបស់ពួកគេបានឡើយបើសិនជានៅក្នុងថ្នាក់ព្រោះវាហប់ខ្លាំងពេក។ ដូច្នេះ ខ្ញុំបានគិតអំពីវិធី ឲ្យពួកគេចេញទៅរៀននិងប្រឡងនៅខាងក្រៅ”។

ស្របពេលជាមួយគ្នានោះ គាត់បានប្រាប់កាសែត Balita ថា “វាជាវិធីសាស្រ្តធម្មជាតិ។ នៅខាងក្រៅមានដើមឈើ និងខ្យល់អាកាសបរិសុទ្ធ”។

គួរបញ្ជាក់ថា ហ្វីលីពីន រួមជាមួយនឹងប្រទេសជាច្រើនទៀតនៅអាស៊ី កំពុងរងការវាយប្រហារដោយរលកកម្តៅ។ សីតុណ្ហភាព​ក្នុង​ប្រទេស​ឥណ្ឌា មីយ៉ាន់ម៉ា និង​ថៃ បាន​និង​កំពុង​ឡើង​ដល់ ៤៥ អង្សារសេ៕

ប្រែសម្រួល៖ Vann Vann

ប្រភព៖ Straits Times

ចុចអាន៖ ៥៩ខេត្តនៅ ថៃ ត្រូវវាយប្រហារដោយព្យុះរដូវក្តៅ