វៀតណាមនឹងចាប់ផ្ដើមសាកល្បងវ៉ាក់សាំងកូវីដទីពីរលើមនុស្សនៅខែក្រោយ

វ៉ាក់សាំងការពារជំងឺកូវីដ ១៩ ផលិតដោយវិទ្យាស្ថានវ៉ាក់សាំង និងជីវសាស្ត្រវេជ្ជសាស្ត្រ (IVAC) កាលពីថ្ងៃអង្គារបានទទួលការអនុម័តពីក្រសួងសុខាភិបាលវៀតណាមសម្រាប់ការសាកល្បងព្យាបាលមនុស្ស ។

វ៉ាក់សាំង Covivac នឹងក្លាយជាវ៉ាក់សាំងទីពីរផលិតដោយវៀតណាមដែលត្រូវបានធ្វើតេស្តលើមនុស្ស បន្ទាប់ពីវ៉ាក់សាំង Nanocovax របស់ក្រុមហ៊ុន Nanogen បានចាប់ផ្តើមសាកល្បងកាលពីខែធ្នូឆ្នាំមុន ។

ក្រសួងសុខាភិបាលវៀតណាមបាននិយាយថា ដំណាក់កាលដំបូងនៃការសាកល្បងនឹងត្រូវការអ្នកស្ម័គ្រចិត្តចំនួន ១២០ នាក់ដែលមានអាយុពី ១៨ ដល់ ៥៩ ឆ្នាំ និងមិនមានបញ្ហាសុខភាព ជំងឺឆ្លង ឬប្រតិកម្មអាឡ័កស៊ី ។

លោក Duong Huu Thai ប្រធានវិទ្យាស្ថាន IVAC បាននិយាយថា វិទ្យាស្ថានដែលជាកម្មសិទ្ធិរបស់ក្រសួងនឹងសម្របសម្រួលជាមួយវិទ្យាស្ថានជាតិអនាម័យ និងរោគរាតត្បាតនៅទីក្រុងហាណូយ និងសាកលវិទ្យាល័យវេជ្ជសាស្ត្រហាណូយដើម្បីចាប់ផ្តើមជ្រើសរើសអ្នកស្ម័គ្រចិត្ត និងរៀបចំឧបករណ៍ និងសម្ភារៈសម្រាប់ការសាកល្បង ។

អ្នកស្ម័គ្រចិត្តនឹងទទួលបានការចាក់លើកដំបូង បន្ទាប់ពីពិធីបុណ្យចូលឆ្នាំថ្មីនៅពាក់កណ្តាលខែកុម្ភៈ ខណៈដំណាក់កាលទី ២ ត្រូវបានរំពឹងថានឹងចាប់ផ្តើមនៅខែមេសា និងទីបីនៅខែកក្កដា ឬសីហា ។

លោក Thai បាននិយាយថា ប្រសិនបើអ្វីៗដំណើរការល្អវិទ្យាស្ថាននឹងចាប់ផ្តើមផលិតវ៉ាក់សាំងនេះយ៉ាងច្រើន ហើយផ្គត់ផ្គង់ចំនួន ៦ លានដូស ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ ភាគខាងជើងប្រទេសវៀតណាមត្រជាក់ខ្លាំង ដល់ថ្នាក់ធ្លាក់ព្រិល

ចុចអាន ៖ វៀតណាមចាប់ផ្តើមសាកល្បងចាក់វ៉ាក់សាំងកូវីដលើមនុស្ស