ជប៉ុន ចាប់ខ្លួនកូនប្រុសប្រធានសភាក្រុង ក្រោយការវាយប្រហារសម្លាប់រង្គាល 

ជប៉ុនបានចាប់ខ្លួនបុរស​ម្នាក់ ​បន្ទាប់​ពី​មនុស្ស​ ៤​ នាក់​ត្រូវ​បាន​សម្លាប់​ ក្នុង​ការ​វាយ​ប្រហារ​ដោយកាំបិត និងកាំភ្លើងនៅ​កណ្តាល​ប្រទេស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យ​បាន​ចាក់​ស្ត្រី​ម្នាក់ រួច​បាញ់​សម្លាប់​ប៉ូលិស​ ២ នាក់​នៅ​ក្នុង​ទីក្រុង Nakano នៃខេត្ត Nagano ហើយក្រោយមក ការស្លាប់មនុស្សទី ៤ ត្រូវបានបញ្ជាក់ ខណៈយោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា ជនសង្ស័យគឺជាកូនប្រុសរបស់ប្រធានសភាក្រុង ។

សាក្សីម្នាក់បានប្រាប់ទីភ្នាក់ងារក្យូដូថា ការវាយប្រហាររបស់បុរសម្នាក់នេះ លើជនរងគ្រោះដំបូង គឺត្រូវបានធ្វើឡើងជាមួយនឹងកាំបិតប្រវែងប្រហែល ៣០ សង់ទីម៉ែត្រ ។ ទោះបីជាយ៉ាងណាក៏ដោយ ហេតុផលដែលជំរុញឲ្យគាត់បើកការវាយប្រហារនេះ នៅមិនទាន់ត្រូវបានគេដឹងច្បាស់ទេ ។

គួរបញ្ជាក់ថា​ អំពើហិង្សាដោយកាំភ្លើង នៅតែជារឿងកម្របំផុតក្នុងប្រទេសជប៉ុន ថ្វីបើមានការសម្លាប់អតីតនាយករដ្ឋមន្ត្រី Shinzo Abe កាលពីខែកក្កដាឆ្នាំមុនក៏ដោយ ។ លោក Abe គឺជានាយករដ្ឋមន្ត្រីកាន់អំណាចយូរជាងគេបំផុតរបស់ប្រទេសជប៉ុន ហើយមរណភាពរបស់គាត់ បានបង្កឲ្យមានការភ្ញាក់ផ្អើលពាសពេញប្រទេស។

ក្នុងឆ្នាំ ២០១៤ មានឧបទ្ទវហេតុនៃការស្លាប់ដោយកាំភ្លើង ត្រឹមតែ ៦ លើកប៉ុណ្ណោះនៅប្រទេសជប៉ុន បើធៀបនឹង ៣៣,៥៩៩ ករណីនៅសហរដ្ឋអាមេរិក។

ពាក់ព័ន្ធនឹងច្បាប់កាំភ្លើងវិញ មនុស្សត្រូវឆ្លងកាត់ការពិនិត្យយ៉ាងតឹងរ៉ឹង និងការធ្វើតេស្តសុខភាពផ្លូវចិត្ត ដើម្បីអាចទិញកាំភ្លើងបាន ។ យ៉ាងណាក្តី មាន​តែ​កាំភ្លើង​ខ្លី និង​កាំភ្លើង​ខ្យល់​ប៉ុណ្ណោះ ដែល​ត្រូវ​បាន​អនុញ្ញាតឲ្យទិញ ៕

ប្រែសម្រួល៖ Vann Vann

ប្រភព៖ BBC

ចុចអាន៖ ប៉ូលិសរកឃើញតម្រុយថ្មីបន្ថែមទៀតរបស់ជនសង្ស័យប៉ុនប៉ងធ្វើឃាតនាយករដ្ឋមន្ត្រី ជប៉ុន