មួយសប្តាហ៍ហើយ ដែលរថយន្តដឹកទុរេនវៀតណាម ៧០០គ្រឿង ជាប់នៅព្រំដែន ចេញទៅ ចិន មិនរួច

រថយន្តដឹកទុរេនវៀតណាមប្រមាណ៧០០គ្រឿង កំពុងជាប់គាំងនៅខេត្ត Lang Son ខណៈព្យាយាមចូលប្រទេសចិន ស្របពេលតម្រូវការផ្លែឈើមួយមុខនេះ កំពុងហក់ឡើងខ្លាំងក្នុងរដូវប្រមួលផល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Hoang Khanh Duy អនុប្រធានការិយាល័យរដ្ឋាភិបាល គ្រប់គ្រងច្រកព្រំដែន Lang Son បាននិយាយថា ការកកស្ទះនៅព្រំដែនភាគខាងជើងមួយនេះ គឺមានរយៈពេលជាងមួយសប្តាហ៍មកហើយ ជាពិសេសនៅច្រក Huu Nghi ដែលជាកន្លែង ការនាំចេញទុរេនស្រស់ទៅកាន់ប្រទេសចិន ត្រូវបានអនុញ្ញាតជាផ្លូវការ។

ទោះបីជាយ៉ាងណាក៏ដោយ ​អាជ្ញាធរ​បាន​ព្យាយាម​ធានា​ដល់​អ្នក​ធ្វើ​ដំណើរ​ថា ច្រក​ព្រំដែន​ទាំង​ប្រាំ​ក្នុង​ខេត្ត​នេះ គឺ​ដំណើរការជា​ធម្មតា មិនមានបញ្ហាចោទអ្វីនោះទេ។

ស្របពេលជាមួយគ្នានោះដែរ លោក Duy បានស្នើឲ្យសមភាគីចិន ធ្វើការបន្ថែមម៉ោង ដើម្បីជួយសម្រួលចរាចរណ៍នៅ Huu Nghi។

គួរបញ្ជាក់ថា កាលពីល្ងាចថ្ងៃពុធទី៣១ខែឧសភា នាយករដ្ឋមន្ត្រីវៀតណាមលោក Pham Minh Chinh បានអំពាវនាវដល់ស្ថាប័នរដ្ឋាភិបាល ឲ្យពន្លឿនការដឹកជញ្ជូនផលិតផលទៅកាន់ប្រទេសចិន។ លោកសង្កត់ធ្ងន់ថា នីតិវិធីទាំងឡាយគួរតែត្រូវធ្វើឲ្យបាន ដើម្បីបង្កើនចរាចរណ៍ ដូច្នេះផ្លែឈើអាចដឹកទៅដល់គោលដៅក្នុងប្រទេសចិនបាន ទាំងនៅស្រស់៕

ប្រែសម្រួល៖ Vann Vann

ប្រភព៖ VN Express

ចុចអាន៖ ការនាំចេញ ទុរេន ថៃ ទៅកាន់ទីផ្សារ ចិន កំពុងប្រឈមការគំរាមកំហែងពី ប្រទេសក្នុងតំបន់ចំនួន ២