លោក ត្រាំ ម៉ៅភោជនីយដ្ឋាន ប៉ាវបាយមនុស្សគ្រប់គ្នា ក្រោយចេញពីតុលាការ

ក្រោយពេលចាកចេញពីតុលាការសហព័ន្ធក្នុងទីក្រុង Miami កាលពីថ្ងៃអង្គារទី១៣ខែមិថុនា លោក ដូណាល់ ត្រាំ បានដើរត្រង់សំដៅទៅភោជនីយដ្ឋាន Versailles ដោយប៉ាវមនុស្សគ្រប់គ្នានៅក្នុងនោះ ថែមទាំងស្តាប់គេច្រៀងបទចម្រៀងអបអរថ្ងៃខួបកំណើតទៀតផង។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតប្រធានាធិបតីដែលឈានចូលវ័យ៧៧ឆ្នាំរូបនេះ បានធ្វើការអធិស្ឋានជាមួយមេដឹកនាំសាសនា រួចថតរូបជាមួយកីឡាករលេងគុនចម្រុះ Jorge Masvidal ហើយរិះគន់ខ្លាំងចំពោះការដឹកនាំរបស់រដ្ឋាភិបាលអាមេរិក។

បន្ទាប់មិនសារភាពទទួលស្គាល់ទោសកំហុស ចំពោះការចោទប្រកាន់សហព័ន្ធ៣៧ករណីទាក់ទងនឹងការកាន់កាប់ឯកសារសម្ងាត់ លោក ត្រាំ បានបង្កភាពភ្ញាក់ផ្អើល ដោយដើរចូលភោជនីយដ្ឋានដ៏ល្បីល្បាញ ហើយស្រែកថា “អាហារសម្រាប់អ្នកទាំងអស់គ្នា”។

លោក ត្រាំ បានថ្លែងទៅកាន់អ្នកគាំទ្ររបស់គាត់ថា “ខ្ញុំគិតថា រឿងរ៉ាវនឹងដំណើរការទៅដោយរលូន។ ខ្ញុំគិតថា វាជាកិច្ចព្រមព្រៀងក្លែងបន្លំនៅទីនេះ។ បន្តិចទៀត ខ្ញុំនឹងថ្លែងសុន្ទកថានៅ Bedminster ហើយខ្ញុំសង្ឃឹមថា អ្នកនឹងទៅទីនោះដើម្បីស្តាប់”។

គួរបញ្ជាក់ថា ទាំងលោក ត្រាំ និងជំនួយការរបស់គាត់ឈ្មោះ Walt Nauta ត្រូវបានចោទប្រកាន់ក្នុងគម្រោងរក្សាទុកឯកសារសម្ងាត់នៅ Mar-a-Lago។

ពាក់ព័ន្ធរឿងនេះ បានធ្វើឲ្យលោក ត្រាំ ​ក្លាយ​ជាអតីត​ប្រធានាធិបតី​អាមេរិកទី១ ​ដែល​ត្រូវ​បាន​ចោទ​ប្រកាន់​ពី​បទ​ឧក្រិដ្ឋកម្ម​សហព័ន្ធ ហើយនេះក៏​ជា​លើក​ទី​២ ផងដែរក្នុង​ឆ្នាំ២០២៣ ដែលលោក ត្រាំ ឡើងតុលាការ។

កាលពីខែមេសា លោកបានសារភាពថា មិនមានទោសកំហុសនៅក្នុងទីក្រុងញូវយ៉ក ចំពោះការចោទប្រកាន់ ទាក់ទងនឹងការបង់ប្រាក់បំបិទមាត់ ទៅឲ្យតារាអាសអាភាសម្នាក់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក ត្រាំ មិនសារភាពទោសកំហុស ហើយថា អាមេរិក ជាប្រទេសពុករលួយ