លោក ត្រាំ មិនសារភាពទោសកំហុស ហើយថា អាមេរិក ជាប្រទេសពុករលួយ

កាលពីថ្ងៃអង្គារ ទី១៣ ខែមិថុនា អតីតប្រធានាធិបតីអាមេរិក លោក ដូណាល់ ត្រាំ បានបង្ហាញខ្លួនក្នុងតុលាការនៃទីក្រុង Miami រដ្ឋ Florida ហើយមិនសារភាពទោសកំហុសទេ ក្នុងការចោទប្រកាន់លាក់បាំងឯកសារសម្ងាត់របស់រដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានប្រឈមមុខនឹងបទល្មើសចំនួន ៣៧ រួមទាំងការលាក់បាំងឯកសារការពារជាតិ សមត្ថភាពយោធារបស់ប្រទេសផ្សេងៗ និងអាថ៌កំបាំងនុយក្លេអ៊ែរផងដែរ ខណៈកាលពីខែសីហាឆ្នាំមុន ភ្នាក់ងារ FBI បានរឹបអូសឯកសាររាប់រយ ពីអចលនទ្រព្យរបស់លោក នៅរដ្ឋ Florida។

បន្ទាប់​ពី​សវនាការ លោក ត្រាំ បាន​ដើរ​ចេញ​ពី​តុលាការឆ្ពោះ​ទៅ​ភោជនីយដ្ឋាន​មួយកន្លែង ​ដើម្បី​ជួប​ជាមួយ​​អ្នក​គាំទ្រ​របស់​លោក ហើយលោកថែមទាំងបានចាត់ទុក ​ការ​ចោទ​ប្រកាន់​នេះ​ គឺ​ជារឿងក្លែងបន្លំ ​និង​ជារឿង​នយោបាយ​ និងថែមទាំងលើកឡើង​ថា ​សហរដ្ឋ​អាមេរិក គឺ​ជា​ប្រទេសពុក​រលួយ ។

ក្នុងនោះ លោកបានចោទប្រកាន់ថា ប្រធានាធិបតី ចូ បៃដិន បានរៀបចំឆាកល្ខោននេះ ដើម្បីធ្វើឲ្យខូចដល់យុទ្ធនាការឃោសនាបោះឆ្នោតរបស់លោក។

គួរបញ្ជាក់ថា លោក​បាន​ក្លាយ​ជាអតីត​ប្រធានាធិបតី​អាមេរិកទី១ ​ដែល​ត្រូវ​បាន​ចោទ​ប្រកាន់​ពី​បទ​ឧក្រិដ្ឋកម្ម​សហព័ន្ធ ហើយនេះក៏​ជា​លើក​ទី​២ ផងដែរក្នុង​ឆ្នាំ២០២៣ ដែលលោក ត្រាំ បានឡើងតុលាការ ។ កាលពីខែមេសា លោកបានសារភាពថា មិនមានទោសកំហុសនៅក្នុងទីក្រុងញូវយ៉ក ចំពោះការចោទប្រកាន់ ទាក់ទងនឹងការបង់ប្រាក់បំបិទមាត់ ទៅឲ្យតារាអាសអាភាសម្នាក់៕

ប្រែសម្រួល៖ Vann Vann

ប្រភព៖ NHK

ចុចអាន៖ លោក ដូណាល់ ត្រាំ ត្រូវតុលាការចោទ ពីបទ កាន់កាប់ឯកសារសម្ងាត់