វៀតណាម ចេញមុខបញ្ជាក់រឿងយន្តហោះគ្មានមនុស្សបើកហោះចូលដែន​អាកាស កម្ពុជា

ក្រសួងការបរទេសវៀតណាមបានចេញមកឆ្លើយតបទៅនឹងសំណួររបស់សារព័ត៌មាន Tuoi Tre ទាក់ទងនឹងការដាក់ពង្រាយកងកម្លាំងយោធារបស់កម្ពុជានាពេលថ្មីៗនេះ បន្ទាប់ពីរកឃើញយន្តហោះគ្មានមនុស្សបើកមិនស្គាល់អត្តសញ្ញាណជាច្រើនគ្រឿងបានហោះហើរចូលទៅក្នុងដែនអាកាសរបស់ប្រទេសកម្ពុជា ។

អ្នកនាំពាក្យក្រសួងការបរទេសវៀតណាម លោកស្រី Pham Thu Hang បាននិយាយកាលពីពេលថ្មីៗនេះថា “អាជ្ញាធរ​វៀតណាមបានបញ្ជាក់ហើយ យន្តហោះគ្មានមនុស្សបើកដែលហោះចូលដែនអាកាសកម្ពុជា មិនមែនជារបស់វៀតណាមនោះទេ ហើយភាគីទាំងពីរតែងតែសហការគ្នាយ៉ាងជិតស្និទ្ធលើបញ្ហានៃការគ្រប់គ្រង និងការពារព្រំដែន សន្តិសុខសណ្តាប់ធ្នាប់ និងការប្រយុទ្ធប្រឆាំងនឹងឧក្រិដ្ឋកម្មនៅតាមតំបន់ព្រំដែន” ។

លោក​ស្រី​បាន​ថ្លែង​ថា​ “ភាគីវៀតណាមសង្ឃឹម​នឹង​បន្ត​កិច្ច​សហប្រតិបត្តិការ​ជាមួយ​កម្ពុជា​ក្នុង​ការ​ពង្រឹង​ខ្សែ​បន្ទាត់​ព្រំដែន​សន្តិភាព មិត្តភាព កិច្ច​សហប្រតិបត្តិការ និង​ការ​អភិវឌ្ឍ” ។

គួរបញ្ជាក់ថា ហេតុការណ៍យន្តហោះគ្មានមនុស្សបើកនេះបានកើតឡើងនៅក្នុងខេត្តមណ្ឌលគិរី ដែលស្ថិតនៅភាគខាងកើតនៃប្រទេសកម្ពុជា ជាប់ព្រំប្រទល់ខេត្ត Dak Lak, Dak Nong និង Binh Phuoc ក្នុងតំបន់ខ្ពង់រាបកណ្តាលនៃប្រទេសវៀតណាម ។

ពាក់ព័ន្ធនឹងបញ្ហានេះដែរ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីយប់ថ្ងៃទី២៧ ខែមិថុនា បានបញ្ជាឲ្យដាក់ពង្រាយទាហាន ៥០០ នាក់ និងអាវុធប្រឆាំងយន្តហោះ ២០០ ដើមទៅកាន់ព្រំដែនភាគខាងកើត បន្ទាប់ពីរកឃើញយន្តហោះគ្មានមនុស្សបើកហោះចូលដែនអាកាសរបស់កម្ពុជា ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ នៅសល់ជនសង្ស័យប្រដាប់អាវុធ ៥ នាក់ទៀត វៀតណាម មិនទាន់ចាប់បាន ក្រោយរត់ចេញពីខេត្តជាប់ កម្ពុជា