ព័ត៌មានអន្ដរជាតិ

នៅសល់ជនសង្ស័យប្រដាប់អាវុធ ៥ នាក់ទៀត វៀតណាម មិនទាន់ចាប់បាន ក្រោយរត់ចេញពីខេត្តជាប់ កម្ពុជា

បានផុស

៣ years មុន

នៅ

ថ្ងៃចន្ទ ៣ កក្កដា ២០២៣

ដោយ

វៀតណាមនៅតែបន្តតាមចាប់ខ្លួនជនសង្ស័យប្រដាប់អាវុធចំនួន ៥ នាក់ទៀត ដែលជាប់ពាក់ព័ន្ធនឹងការសម្លាប់មនុស្ស ៩ នាក់នៅឯការិយាល័យរដ្ឋបាលក្នុងខេត្ត Dak Lak ដែលមានព្រំប្រទល់ជាប់ខេត្តមណ្ឌលគិរីរបស់ព្រះរាជាណាចក្រកម្ពុជាកាលពីខែមុន ។

ប៉ូលិសនៅក្នុងខេត្ត Dak Lak បានប្រកាសកាលពីថ្ងៃអាទិត្យថា ក្រុមប្រដាប់អាវុធដែលរត់គេចខ្លួនទាំង ៥ នាក់ដែលរួមមានឈ្មោះ Y Khing Lieng អាយុ ៣១ ឆ្នាំ, Nay Yen អាយុ ៥៣ ឆ្នាំ, Y Ju Nie អាយុ ៥៥ ឆ្នាំ, Nay Tam អាយុ ៤៩ ឆ្នាំ និង Nay Duong អាយុ ៥៥ ឆ្នាំកំពុងស្ថិតនៅក្នុងការស្វែងរកតាមចាប់ខ្លួន បន្ទាប់ពីអាជ្ញាធរបានចោទប្រកាន់ពួកគេពីបទប្រព្រឹត្តអំពើភេរវកម្ម ។

អាជ្ញាធរបាននិយាយទៀតថា បច្ចុប្បន្នអ្នកទាំង ៥ នាក់នោះបានរត់គេចខ្លួនចេញពីខេត្ត Dak Lak រួចហើយ ហើយរហូតមកដល់ពេលនេះ ក៏មិនទាន់មានតម្រុយថាពួកគេសំងំលាក់ខ្លួននៅទីណា ខណៈអាជ្ញាធរបានជូនដំណឹងថា អ្នកណាក៏ដោយក៏មានសិទ្ធិចាប់ជនសង្ស័យប្រដាប់អាវុធទាំងនោះយកទៅឲ្យសមត្ថកិច្ចដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា កាលពីថ្ងៃទី១១ ខែមិថុនា ក្រុមប្រដាប់អាវុធចំនួន ២ បានបើកការវាយប្រហារលើការិយាល័យគណៈកម្មាធិការប្រជាជននៅឃុំ Ea Ktur និង Ea Tieu ដោយបានសម្លាប់មន្ត្រី ប៉ូលិស និងជនស៊ីវិលចំនួន ៩ នាក់ ខណៈ រហូតមកដល់ពេលនេះ ជនសង្ស័យប្រមាណ ៩០ នាក់ត្រូវបានចាប់ខ្លួនពីបទឧក្រិដ្ឋកម្មជាច្រើន រួមទាំងអំពើភេរវកម្មផងដែរ ។

ក្នុងចំណោមជនសង្ស័យទាំងនោះ គឺមានម្នាក់ជាសមាជិកនៃអង្គការភេរវកម្មដែលមានមូលដ្ឋាននៅសហរដ្ឋអាមេរិក ហើយពួកគេទទួលបានការណែនាំពីអង្គការ ដើម្បីចូលមកប្រទេសវៀតណាម និងធ្វើការវាយប្រហារនេះតែម្ដង ជាពិសេសអង្គការថែមទាំងបានសន្យានឹងនាំពួកគេទៅក្រៅប្រទេស និងផ្ដល់លុយឲ្យពួកគេក្លាយជាអ្នកមាន ឲ្យតែសម្លាប់អ្នកណានៅចំពោះមុខ ៕