ត្រាំ ពន្លះ បៃដិន ទៀតហើយ តែលើកនេះរឿងកេនទ័ពបម្រុង អាមេរិក ទៅដាក់នៅអឺរ៉ុប

អតីតប្រធានាធិបតីអាមេរិក លោក ដូណាល់ ត្រាំ កាលពីថ្ងៃសៅរ៍បានរិះគន់បទបញ្ជាប្រតិបត្តិរបស់លោក ចូ បៃដិន ដែលកំពុងកាន់អំណាច ស្តីពីការកេនទ័ពបម្រុងសម្រាប់ដាក់ពង្រាយនៅអឺរ៉ុប ។

លោក ត្រាំ បាននិយាយនៅក្នុងសេចក្តីថ្លែងការណ៍មួយថា “ការសម្រេចចិត្តរបស់លោក បៃដិន ក្នុងការកេនកងកម្លាំងបម្រុងសម្រាប់ការដាក់ពង្រាយនៅអឺរ៉ុប បង្ហាញឲ្យឃើញពីការកើនឡើងនៃគ្រោះថ្នាក់ដោយមិនប្រុងប្រយ័ត្ននៅក្នុងប្រទេសអ៊ុយក្រែន ជាពិសេសកំពុងធ្វើឲ្យយោធាសហរដ្ឋអាមេរិកឈានដល់គ្រោះមហន្តរាយ” ។

ដោយឡែកពាក់ព័ន្ធនឹងការផ្ដល់គ្រាប់បែកចង្កោមទៅឲ្យអ៊ុយក្រែនកាលពីពេលថ្មីៗនេះវិញ, លោក ត្រាំ បានអះអាងថា ទុនបម្រុងបច្ចុប្បន្នរបស់សហរដ្ឋអាមេរិកកាន់តែខើចៗទៅហើយ ហើយវាក៏ជាគោលនយោបាយមហន្តរាយរបស់លោក បៃដិន នៅអឺរ៉ុបផងដែរ ស្របដែលព្រំដែនរបស់ខ្លួនវិញ នឹងកាន់តែមានភាពងាយរងគ្រោះ ។

លោក ត្រាំ បញ្ជាក់ទៀតថា “រឿងចុងក្រោយដែលរដ្ឋបាលអសមត្ថភាពរបស់លោក បៃដិន កំពុងតែធ្វើ គឺជំរុញឲ្យយើងឆ្ពោះទៅរក ‘សង្រ្គាមលោកលើកទីបី’ ដោយសារតែប្រធានាធិបតីរូបនេះ បានប្រកាសនឹងបន្តបញ្ជូនទ្រព្យសម្បត្តិ និងសព្វាវុធរបស់អាមេរិក ដើម្បីបញ្ឆេះសង្រ្គាមមិនចេះចប់នៅអ៊ុយក្រែន ឲ្យតែរដ្ឋាភិបាលទីក្រុងកៀវត្រូវការ” ។

ជាចុងក្រោយអតីតប្រធានាធិបតីអាមេរិករូបនេះបានរំឭកឡើងវិញថា លោកអាចបញ្ចប់សង្រ្គាមនៅអ៊ុយក្រែនដោយប្រើរយៈពេលតែ ២៤ ម៉ោង ប្រសិនបើលោកក្លាយជាប្រធានាធិបតី ហើយលោកថែមទាំងបានសង្កត់ធ្ងន់ថា “គ្មានឪពុកម្តាយអាមេរិកណាម្នាក់ចង់បញ្ជូនកូនរបស់ពួកគេទៅស្លាប់នៅអឺរ៉ុបខាងកើតនោះទេ” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ៣ ចំណុចសំខាន់ៗអំពីរឿងរ៉ាវគ្រាប់បែកចង្កោមដែល អាមេរិក ផ្ដល់ទៅឲ្យ អ៊ុយក្រែន