បុរសថៃម្នាក់ប៊ិះដាច់ជើង ដោយសារតែជណ្ដើរយន្តក្នុងផ្សារទំនើបនៅខេត្ត Nonthaburi

បុរសថៃវ័យប្រហែល ៣០ ឆ្នាំម្នាក់ប៊ិះនឹងដាច់ជើងទៅហើយ ដោយសារតែជណ្ដើរយន្តនៅផ្សារទំនើបមួយកន្លែងក្នុងខេត្ត Nonthaburi ប៉ុន្តែសំណាងល្អគាត់បានដកជើងចេញទាន់ ដោយនៅជាប់តែស្បែកជើងមួយចំហៀងប៉ុណ្ណោះ ។

បញ្ហាជណ្ដើរយន្តនេះគឺជាលើក​ទី​ ២ ​ហើយ បន្ទាប់​ពី​ស្ត្រី​ម្នាក់​បាន​ដាច់ជើងក្រោយជាប់ជាមួយនឹងជណ្ដើរយន្តនៅ​ព្រលាន​យន្តហោះ​ដនមឿង កាល​ពី​ថ្ងៃ​ទី​២៩ ខែ​មិថុនា ។

ឃ្លីបវីដេអូ Tik-Tok ដែលបង្ហោះដោយអ្នកប្រើប្រាស់ម្នាក់ឈ្មោះ Pook Saranya បង្ហាញឲ្យឃើញពីសកម្មភាពព្យាយាមដកស្បែកជើងពណ៌ខ្មៅមួយចំហៀងចេញ ព្រោះវាជាប់គាំងក្នុងជណ្ដើរយន្តឡើងទៅជាន់ទី ២ នៃផ្សារទំនើប Central Westgate ។

កាលពីថ្ងៃអាទិត្យ អ្នកស្រី Pook វ័យ ៣៤ ឆ្នាំជាបុគ្គលិកផ្នែកលក់នៅផ្សារទំនើប Central Westgate ប្រាប់អ្នកសារព័ត៌មានថា នាងបានថតហេតុការណ៍នេះ បន្ទាប់ពីឃើញមនុស្សយ៉ាងច្រើននៅក្បែរជណ្ដើរយន្ត ។ អ្នកស្រី​បន្ត​ថា ម្ចាស់​ស្បែកជើង​ជា​បុរស​អាយុ​ប្រហែល ​៣០ ​ឆ្នាំ ប៊ិះតែនឹងជាប់ជើងជាមួយជណ្ដើរយន្តទៅហើយ ប៉ុន្តែគាត់បានដកជើងចេញទាន់ ហើយក្រោយមក​បាន​ចាក​ចេញពី​កន្លែង​កើតហេតុ​ដោយសុវត្ថិភាព ​។

ពាក់ព័ន្ធនឹងរឿងខាងលើ ផ្សារ Central Westgate បានរៀបរាប់ក្នុង Facebook ថា វាកើតឡើងនៅម៉ោងប្រហែល ២ រសៀល ហើយស្បែកជើងដែលជាប់នៅក្នុងជណ្ដើរយន្ត គឺដោយសារបុរសនោះដើរចេញមិនទាន់ពេលវេលា ប៉ុន្តែទោះជាយ៉ាងណា បុគ្គលិកបានបញ្ឈប់ជណ្ដើរយន្តភ្លាមៗ ហើយគ្មាននរណាម្នាក់រងរបួសនោះទេ ។

មួយវិញទៀត ខាងផ្សារក៏បានចាត់វិធានការយ៉ាងសកម្ម ដើម្បីធានាសុវត្ថិភាពរបស់អតិថិជនផងដែរ ជាពិសេសការត្រួតពិនិត្យ និងការថែទាំជាប្រចាំ ខណៈសូម្បីបុគ្គលិក​ក៏​ទទួល​បាន​ការ​ហ្វឹកហ្វឺន​យ៉ាង​ល្អ​ដើម្បី​ដោះស្រាយ​ស្ថានការណ៍​ដែល​មិន​នឹក​ស្មាន​ដល់បែបនេះដូចគ្នា ៕

ប្រែសម្រួល៖ វារី

ប្រភព៖ Thenation

ចុចអាន៖ ស្ត្រីម្នាក់ដាច់ជើង ព្រោះជាប់នឹងជណ្ដើរយន្តនៅអាកាសយានដ្ឋានប្រទេសថៃ