មនុស្សម្នាក់ទៀត ស្លាប់ដោយសារ “មេរោគស៊ីខួរក្បាល” នៅ សហរដ្ឋអាមេរិក

អ្នករដ្ឋ Georgia ម្នាក់បានស្លាប់ ដោយសារការឆ្លងមេរោគដ៏កម្រដែលបង្កឡើងដោយប្រូតូហ្សូន ឬគេស្គាល់ជាទូទៅថាជា “មេរោគស៊ីខួរក្បាល”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបគេគឺជាមនុស្សទី៣ដែលស្លាប់នៅសហរដ្ឋអាមេរិកក្នុងឆ្នាំនេះ ដោយសារមេរោគស៊ីខួរក្បាល Naegleria Fowleri ខណៈវាអាចនឹងរីករាលដាលបន្ថែមទៀតនៅភាគខាងជើង ព្រោះតែបម្រែបម្រួលអាកាសធាតុ។

ទោះបីជាយ៉ាងណាក៏ដោយ វាគឺជាករណីទី៦ហើយនៅរដ្ឋ Georgia ដែលមានមនុស្សស្លាប់ដោយសារមេរោគ Naegleria Fowleri ចាប់តាំងពីឆ្នាំ១៩៦២មក។

ក្មេងប្រុសម្នាក់នៅរដ្ឋ Nevada បានស្លាប់ដោយសារការឆ្លងដូចគ្នានេះ កាលពីដើមខែកក្កដា បន្ទាប់ពីទៅមុជទឹកនៅអាងមួយ ចំណែកបុរសម្នាក់នៅរដ្ឋ Florida បានស្លាប់កាលពីខែមីនា បន្ទាប់ពីប្រើទឹកម៉ាស៊ីន។

ក្រុមអ្នកវិទ្យាសាស្រ្តអះអាងថា មេរោគនេះគឺកើតឡើងដោយធម្មជាតិ ហើយវាកាន់តែរីករាលដាលដោយសារតែបម្រែបម្រួលអាកាសធាតុ។ មេរោគនេះ អាចមាននៅតាមកន្លែងនានា ឬកកើតគ្រប់ពេល ដោយគ្មានអ្នកណាអាចដឹងមុនឡើយ ហើយរឿងដែលកាន់តែគួរឲ្យកត់សម្គាល់នោះគឺថា មេរោគស៊ីខួរក្បាលនេះ ចូលចិត្តតំបន់ក្តៅៗ។

យ៉ាងណាក្តី មេរោគនេះ មិនអាចឆ្លងពីមនុស្សទៅមនុស្សបានទេ។ រោគសញ្ញារបស់វាគឺឈឺក្បាលខ្លាំង គ្រុនក្តៅ ចង្អោរ និងក្អួត ចន្លោះពេលពី៥ទៅ១២ថ្ងៃនៃការឆ្លង ហើយនឹងឈានទៅដល់រឹង.ក ប្រកាច់ និងសន្លប់តែម្តង។

អ្នកដែលឆ្លងមេរោគនេះហើយ គឺមិនសូវគេចផុតពីសេចក្តីស្លាប់ឡើយ ពោលគឺមានតែ៤ករណីប៉ុណ្ណោះក្នុងចំណោម ១៥៤ករណី ដែលនៅរស់រានមានជីវិតគិតចាប់តាំងពីឆ្នាំ១៩៦២មក៕

ប្រែសម្រួល៖ Vann Vann

ប្រភព៖ Sputnik

ចុចអាន៖ កូរ៉េខាងត្បូង រកឃើញមេរោគស៊ីខួរក្បាលលើអ្នកជំងឺមកពី ថៃ