ស្ថានភាពសេដ្ឋកិច្ចថៃ និងការពន្យារពេលបង្កើតរដ្ឋាភិបាល

អ្នកវិភាគសេដ្ឋកិច្ចនៃធនាគារ TMB Thanachart លោក Naris Sathapholdeja យល់ថា​ ប្រសិនបើស្ថានការណ៍នយោបាយនៅតែមានស្ថិរភាពនោះ សេដ្ឋកិច្ចថៃត្រូវបានគេរំពឹងថា នឹងបន្តឆ្ពោះទៅមុខសម្រាប់ផ្នែកដែលនៅសល់នៃឆ្នាំនេះ។ សេដ្ឋកិច្ចបានបង្ហាញពីសញ្ញានៃភាពប្រសើរឡើងដែលឈានចូលដល់ឆមាសទីពីរនៃឆ្នាំនេះ ហើយកំណើន GDP ត្រូវបានគេព្យាករថា នឹងមានយ៉ាងហោចណាស់ ៣ភាគរយ សម្រាប់ពេញមួយឆ្នាំ។ ផ្ទុយទៅវិញ ភាពមិនច្បាស់លាស់ខាងនយោបាយអូសបន្លាយ អាចប៉ះពាល់ដល់សេដ្ឋកិច្ចនិងទំនុកចិត្តអន្តរជាតិនៅឆ្នាំក្រោយ។

នៅពេលដែលកម្ដៅនយោបាយកើនឡើង មនុស្សជាច្រើនមានការព្រួយបារម្ភថា រយៈពេលអន្តរកាលអាចប៉ះពាល់ដល់សេដ្ឋកិច្ចនិងទំនុកចិត្តអន្តរជាតិ ជាពិសេសប្រសិនបើមានភាពមិនច្បាស់លាស់ដែលអូសបន្លាយ។

ទន្ទឹមនេះ តម្លៃជួញដូរប្រចាំថ្ងៃក៏បានធ្លាក់ចុះមកត្រឹមតែ ៨៦៥លាន ទៅជាង ១ពាន់លានដុល្លារ ធៀបនឹងរាប់រយពាន់លានដុល្លារពីមុន។ ហើយនៅក្នុងឆមាសទីមួយនៃឆ្នាំ ២០២៣ នេះ  លំហូរចេញមូលនិធិបរទេសសុទ្ធពីទីផ្សារភាគហ៊ុនថៃ មានតម្លៃលើសពីរយពាន់លានបាត ដោយបានកាត់បន្ថយ ១០ភាគរយ នៃតម្លៃសុទ្ធរបស់ភាគហ៊ុនថៃ ដែលនាំផ្សារហ៊ុនថៃ មាន​សភាពអាក្រក់បំផុតទី៣ក្នុងពិភពលោក។ ​

សម្រាប់សេដ្ឋកិច្ចថៃបានពង្រីកក្នុងអត្រាជាមធ្យមពី ៣-៤​ភាគរយ ក្នុងមួយឆ្នាំអស់រយៈពេល ជិតមួយទសវត្សរ៍ បើធៀបនឹងអត្រាកំណើនពី ៥-៧ភាគរយ នៅក្នុងប្រទេសអភិវឌ្ឍន៍ថ្មីៗ។ ជាងនេះទៅទៀត ភាគហ៊ុនថៃបាននិងកំពុងដំណើរការបានល្អតិចជាងសមភាគីក្នុងតំបន់របស់ពួកគេ។

ទោះជាយ៉ាងណាក៏ដោយ សូចនាករសេដ្ឋកិច្ចសម្រាប់ប្រទេសថៃក្នុងខែមិថុនាឆ្នាំនេះ បានបង្ហាញថា សេដ្ឋកិច្ចនៅតែស្ថិតនៅលើផ្លូវស្ទុះងើបឡើងវិញ ស្របតាមការព្យាករណ៍របស់មូលនិធិរូបិយវត្ថុអន្តរជាតិ (IMF) នាពេលថ្មីៗនេះដែលមានកំណើន ៣.៤ ភាគរយ។ ដូចគ្នានេះ នៅដើមខែកក្កដា ធនាគារអភិវឌ្ឍន៍អាស៊ី (ADB) បានបង្កើនការប៉ាន់ស្មានរបស់ខ្លួន សម្រាប់កំណើនសេដ្ឋកិច្ចថៃក្នុងឆ្នាំ ២០២៣ ពី ៣.៣ទៅ ៣.៥ភាគរយ។

ជារួម សេដ្ឋកិច្ចថៃនៅតែស្ថិតនៅលើផ្លូវងើបឡើងវិញ ប៉ុន្តែស្ថានការណ៍ធានាឱ្យមានការសង្កេតយ៉ាងប្រុងប្រយ័ត្ន ជាពិសេសទាក់ទងនឹងទិដ្ឋភាពនយោបាយនិងផលប៉ះពាល់សក្តានុពលរបស់វាទៅលើទំនុកចិត្តរបស់អ្នកវិនិយោគ លំហូរមូលធនបរទេស និងទស្សនវិស័យសេដ្ឋកិច្ចទាំងមូលសម្រាប់ប្រទេស៕

ប្រែសម្រួល៖ នាង រតនៈ

ប្រភព៖​ The Nation Thailand