ចិនសន្យាផ្តល់ថវិកា ៣០០លានយ័ន ដើម្បីអភិវឌ្ឍបណ្តាញផ្លូវរថភ្លើងល្បឿនលឿនតភ្ជាប់ កម្ពុជា-ថៃ-ឡាវ-ចិន

ប្រភពព័ត៌មានបានឱ្យដឹងថា រដ្ឋាភិបាលក្រុងប៉េកាំងបានសន្យាផ្តល់ថវិកាចំនួន៣០០លានយន់ ស្មើនឹង ៤១,៣៤លានដុល្លារ ដើម្បីអភិវឌ្ឍន៍ហេដ្ឋារចនាសម្ព័ន្ធផ្លូវរថភ្លើងល្បឿនលឿនតភ្ជាប់ប្រទេសកម្ពុជា ថៃ ឡាវ និង ចិន។

ក្នុងដំណើរបំពេញទស្សនកិច្ចផ្លូវការនៅកម្ពុជាចំនួន២ថ្ងៃ រដ្ឋមន្ត្រីការបរទេសចិន លោក វ៉ាង យី បានជួបពិភាក្សាការងារជាមួយរដ្ឋមន្ត្រីក្រសួងសាធារណការនិងដឹកជញ្ជូនកម្ពុជា លោក ស៊ុន ចាន់ថុល និងលោកឧបនាយករដ្ឋមន្ត្រី ហោ ណាំហុង នៅរាជធានីភ្នំពេញកាលពីចុងសប្តាហ៍មុន។

ជំនួបនេះធ្វើឡើងក្នុងក្របខ័ណ្ឌការងាររបស់គណៈកម្មការរវាងរដ្ឋាភិបាលកម្ពុជា-ចិន ដែលដឹកនាំដោយលោកឧបនាយករដ្ឋមន្ត្រី ហោ ណាំហុង និងមានការចូលរួមពីមន្ត្រីជាន់ខ្ពស់កម្ពុជាមួយចំនួនទៀត។

ក្នុងសេចក្តីថ្លែងការណ៍ដែលចេញផ្សាយតាមប្រព័ន្ធផ្សព្វផ្សាយ លោក ស៊ុន ចាន់ថុល បាននិយាយថា ចិនគឺជាមិត្តពិត ដោយគម្រោងអភិវឌ្ឍន៍ហេដ្ឋារចនាសម្ព័ន្ធដែលកើតឡើងនោះ ក៏រួមបញ្ចូលទាំងផ្លូវល្បឿនលឿន ភ្នំពេញ-ក្រុងព្រះសីហនុផងដែរ។ ផ្លូវល្បឿនលឿន ភ្នំពេញ-ក្រុងបាវិត ផ្លូវល្បឿនលឿន ភ្នំពេញ-សៀមរាប គម្រោងផ្លូវរថភ្លើងកម្ពុជា និងគម្រោងប្រឡាយ Funanteecho ដែលកំពុងអនុវត្តន៍ដោយមានការគាំទ្រពីលោកប្រធានាធិបតី Xi Jinping។

កម្ពុជាបានសរសើរចិនដែលបានផ្តល់ថវិកាចំនួណ៣០០លានយន់ដើម្បីអភិវឌ្ឍន៍វិស័យផ្លូវដែកនៅកម្ពុជា ព្រមទាំងជំរុញការសាងសង់ផ្លូវរថភ្លើងល្បឿនលឿនតភ្ជាប់ពីរាជធានីភ្នំពេញទៅប្រទេសថៃ ឡាវ និង ចិន។ លោក ហោ ណាំហុង បានថ្លែងអំណរគុណដល់ប្រទេសចិន ដែលបានជួយអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ បណ្តាញពាណិជ្ជកម្ម និងវិស័យផ្សេងៗនៅទូទាំងប្រទេសកម្ពុជារហូតមក។

លោក ហោ ណាំហុង បានគូសបញ្ជាក់ថា ប្រទេសចិនបានជួយដល់ការអភិវឌ្ឍន៍ហេដ្ឋារចនាសម្ព័ន្ធរបស់កម្ពុជា ក្នុងនោះរួមមានការសាងសង់ផ្លូវថ្នល់ប្រវែងជាង ៣ពាន់គីឡូម៉ែត្រ និងស្ពានចំនួន ១០ខ្សែ ដើម្បីសម្រួលដល់ការធ្វើដំណើរ និងលើកកម្ពស់ជីវភាពរបស់នៅរបស់ប្រជាជនកម្ពុជា។

ចំណែកលោក វ៉ាង យី ក៏បានសរសើរចំពោះការខិតខំប្រឹងប្រែងរបស់លោក ហោ ណាំហុង ក្នុងការពង្រឹងទំនាក់ទំនងការទូតប្រទេសទាំងពីរ (ខួបលើកទី៦៥ នៃទំនាក់ទំនងការទូតកម្ពុជា-ចិន) ក្នុងរយៈពេលជាច្រើនឆ្នាំកន្លងមកនេះ ជាពិសេសក្នុងក្របខ័ណ្ឌនៃគណៈកម្មការវាងរដ្ឋាភិបាលកម្ពុជា-ចិន។ ទន្ទឹមគ្នានេះ លោក វ៉ាង យី ក៏បានសង្កត់ធ្ងន់លើការអភិវឌ្ឍន៍ និងការថែរក្សាទំនាក់ទំនងទ្វេភាគីផងដែរ ដែលនាំមកនូវអត្ថប្រយោជន៍ជាច្រើន រួមបញ្ចូលទាំងការលើកកម្ពស់ទំនាក់ទំនងរវាងប្រជាជននិងប្រជាជននៃប្រទេសទាំងពីរ ស្របតាមភាពជាដៃគូយុទ្ធសាស្ត្រដ៏ទូលំទូលាយដែលបានចាប់ផ្តើមនៅក្នុងឆ្នាំ២០១០៕

ប្រែសម្រួល៖ គង់ សំអាន

ប្រភព៖ Mgronline

ចុចអាន៖ ថៃ អាចជួបប្រទះបញ្ហាអគ្គិសនី ដោយសារតែ​គ្រោះរាំងស្ងួត