ពាក់កណ្ដាលខែនេះ អ៊ុយក្រែន អាចនឹងទទួលបានរថក្រោះដែល អាមេរិក ជួសជុលហើយ ១០ គ្រឿង

កាសែត Politico បានរាយការណ៍ដោយដកស្រង់សម្ដីមន្ត្រីរបស់មន្ទីរបញ្ចកោណថា នៅពាក់កណ្តាលខែកញ្ញានេះ កងកម្លាំងប្រដាប់អាវុធអ៊ុយក្រែនអាចនឹងទទួលបានរថក្រោះ M1 Abrams ផលិតដោយសហរដ្ឋអាមេរិកចំនួន ១០ គ្រឿង ក្នុងចំណោម ៣១ គ្រឿងដែលបានសន្យាជាមួយរដ្ឋាភិបាលក្រុងកៀវ ។

យោងតាមរបាយការណ៍នេះបានឲ្យដឹងទៀតថា បច្ចុប្បន្នរថក្រោះ M1 Abrams ត្រូវបានដឹកទៅកាន់ប្រទេសអាល្លឺម៉ង់រួចរាស់អស់ហើយ ហើយនឹងត្រូវបញ្ជូនបន្តទៅឲ្យអ៊ុយក្រែន បន្ទាប់ពីបញ្ចប់ការជួសជុល ។

ពាក់ព័ន្ធនឹងបញ្ហានេះដែរ ​អ្នកនាំពាក្យ​កងទ័ព​អាមេរិកប្រចាំ​នៅទ្វីប​អឺរ៉ុប និង​អាហ្វ្រិក​លោក Martin O’Donnell បានលើកឡើងថា “​អាមេរិក​ប្តេជ្ញានឹង​ពន្លឿនក្នុង​ការ​បញ្ជូន​រថក្រោះ M1 Abrams ទាំង ៣១ គ្រឿង​ទៅ​ឲ្យ​អ៊ុយក្រែនតាមការសន្យា​នៅចន្លោះខែកញ្ញាដល់ខែវិច្ឆិកា ។

លោក O’Donnell បញ្ជាក់ទៀតថា ការសម្រេចបញ្ជូនរថក្រោះ M1 Abrams នេះ គឺស្របពេលដែលទាហានអ៊ុយក្រែនប្រមាណ ២០០ នាក់ក៏បានបញ្ចប់វគ្គសិក្សាក្នុងការប្រើប្រាស់រថក្រោះប្រភេទនេះរួចហើយផងដែរ នៅមូលដ្ឋានហ្វឹកហ្វឺនសហរដ្ឋអាមេរិកក្នុងប្រទេសអាល្លឺម៉ង់ ។

គួរបញ្ជាក់ថា សហរដ្ឋអាមេរិកបានប្រកាសផ្ដល់កញ្ចប់ជំនួយយោធាក្នុងទំហំទឹកប្រាក់រាប់រយពាន់លានដុល្លារទៅឲ្យរដ្ឋាភិបាលទីក្រុងកៀវ ចាប់តាំងពីផ្ទុះសង្គ្រាមលុកលុយរបស់រុស្ស៊ីលើអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ មក ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អ៊ុយក្រែន គំរាមវាយប្រហារចូលជ្រៅ ក្នុងទឹកដីរុស្ស៊ី ក្រោយផលិតបានមីស៊ីលរយៈចម្ងាយឆ្ងាយ