មេទ័ពអាកាសអាស៊ាន៤ប្រទេស មិនចូលរួមសន្និសីទនៅមីយ៉ាន់ម៉ា ខណៈឆ្នាំក្រោយ កម្ពុជា នឹងរៀបចំកិច្ចប្រជុំនេះ វិញម្តង

មេទ័ពអាកាសមកពីប្រទេសជាច្រើនជុំវិញតំបន់អាស៊ីអាគ្នេយ៍ មិនបានចូលរួមសន្និសីទក្នុងប្រទេសមីយ៉ាន់ម៉ានៅសប្តាហ៍នេះឡើយ បន្ទាប់ពីប្លុកក្នុងតំបន់អាស៊ាន ចោទប្រកាន់យោធាដែលកំពុងកាន់អំណាចថា បានកំណត់គោលដៅលើជនស៊ីវិល ក្នុងការបង្ក្រាបក្រោយរដ្ឋប្រហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបដិសេធនេះកើតឡើង បន្ទាប់ពីសមាគមប្រជាជាតិអាស៊ីអាគ្នេយ៍ (អាស៊ាន) ក៏ចោទប្រកាន់យោធាកាលពីសប្តាហ៍មុនផងដែរថា មិនអើពើនឹងផែនការសន្តិភាពដែលបានព្រមព្រៀងជាមួយប្លុក ដើម្បីបញ្ចប់អំពើហិង្សា។

មីយ៉ាន់ម៉ានៅតែជាសមាជិកអាស៊ាន ប៉ុន្តែមេដឹកនាំយោធារបស់ខ្លួន ត្រូវបានដកចេញពីកិច្ចប្រជុំកំពូល ចាប់តាំងពីការចូលកាន់តំណែង។

ប្រមុខកងកម្លាំងដែនអាកាសនៃប្លុក១០ប្រទេស បានជួបប្រជុំគ្នាជារៀងរាល់ឆ្នាំ ដើម្បីពិភាក្សាអំពីកិច្ចសហប្រតិបត្តិការក្នុងវិស័យការពារជាតិ ការប្រយុទ្ធប្រឆាំងនឹងក្រុមជ្រុលនិយម និងការសង្គ្រោះគ្រោះមហន្តរាយ។

ឆ្នាំនេះ ប្រទេសមីយ៉ាន់ម៉ាត្រូវធ្វើជាម្ចាស់ផ្ទះ ខណៈការជួបជុំបានចាប់ផ្តើមតាំងតែងពីថ្ងៃពុធ ទី១៣ខែកញ្ញា និងបញ្ចប់ទៅវិញនៅថ្ងៃសុក្ រទី១៥ ខែកញ្ញា ហើយបន្ទាប់ពីមីយ៉ាន់ម៉ា កិច្ចប្រជុំនេះ នឹងត្រូវធ្វើឡើងនៅប្រទេសកម្ពុជាវិញម្តងក្នុងឆ្នាំ២០២៤ ។

ទោះបីជាយ៉ាងណាក៏ដោយ មេទ័ពអាកាសនៃប្រទេសឥណ្ឌូណេស៊ី ម៉ាឡេស៊ី ហ្វីលីពីន និងសិង្ហបុរី មិនបានធ្វើដំណើរទៅចូលរួមកិច្ចប្រជុំនោះទេ។ ដោយឡែក មេទ័ពអាកាសមកពីប្រទេសកម្ពុជា ព្រុយណេ ឡាវ ថៃ និងវៀតណាម បានទៅដល់រដ្ឋធានី ណៃពិដោ តាំងតែពីថ្ងៃអង្គារទី១២ខែកញ្ញាមកម្ល៉េះ ៕

ប្រែសម្រួល៖ Vann Vann

ប្រភព៖ CNA

ចុចអាន៖ ឥណ្ឌូណេស៊ី សង្ឃឹមថា អាស៊ាន នឹងមិនក្លាយជាចំណាប់ខ្មាំង ដោយសារតែ​វិបត្តិ មីយ៉ាន់ម៉ា នោះទេ